24 кастрычніка ў рамках чацвёртага пасяджэння сумеснай беларуска-польскай камісіі па эканамічным супрацоўніцтве Беларусь наведае намеснік прэм'ер-міністра, міністр развіцця Польшчы Матэуш Маравецкі.
Паводле інфармацыі сайта Беларускай гандлёва-прамысловай палаты, Маравецкі таксама плануе ўзяць удзел у штогадовым беларуска-польскім эканамічным форуме «Добрасуседства-2016», які пройдзе ў Мінску 24 кастрычніка.
Як паведаміла прэс-служба МЗС Беларусі, падрыхтоўку да пасяджэння беларуска-польскай камісіі абмеркавалі 19 кастрычніка ў Мінску намеснік міністра замежных спраў Беларусі Алена Купчына і пасол Польшчы Конрад Паўлік.
10 кастрычніка падчас візіту ў Варшаву міністр замежных спраў Беларусі Уладзімір Макей заяўляў: «Мы дамовіліся аб тым, што мы створым максімальна спрыяльныя ўмовы для правядзення пасяджэння сумеснай міжурадкамісіі, якая адбудзецца 24 кастрычніка гэтага года ў Мінску, і зробім усё для таго, каб праца гэтай камісіі была нацэленая на атрыманне канкрэтных вынікаў».
