Дасьледніцкі цэнтар Інстытуту прадпрымальніцтва і мэнэджмэнту зладзіў сэмінар «Пэнсійная сыстэма Беларусі: адносіны насельніцтва і магчымасьці зьменаў».
На сэмінары былі прэзэнтаваныя вынікі дасьледваньня адносінаў насельніцтва да пэнсійнай сыстэмы Беларусі і яе ўстойлівасьць да дэмаграфічных зьменаў, што ладзіліся экспэртамі Дасьледніцкага цэнтру ў 2007—2008 гг. Акрамя таго, быў разгледжаны беларускі вопыт дадатковага пэнсійнага страхаваньня, і прапанаваныя накірункі пэнсійнай рэформы.
Адносіны насельніцтва да пэнсійнай сыстэмы Беларусі і сацыяльныя ўстаноўкі беларусаў у адносінах да пэнсіі прадставіла Марына Батурчык, мэнэджэр праектаў Кансалтынгавай кампаніі Indecom пры Бізнэс-школе ІПМ.
Віктар Хамярчук, старшыня Беларускага страхавога саюзу, распавёў пра магчымасьці дадатковага пэнсійнага страхаваньня, што існуюць у Беларусі.
Вынікі мадэляваньня, прадстаўленыя эканамістам Дасьледніцкага цэнтру ІПМ Аляксандрам Чубрыкам, засьведчылі недастатковасьць аднаго толькі разьмеркавальнага ўзроўню ў пэнсійнай сыстэме.
Дар’я Слабчанка (БДЭУ) паведаміла пра эфэктыўнасьць шматузроўневай пэнсійнай сыстэмы, пра сьведчыць і сусьветны вопыт.
Канцэпцыя рэформы першага і стварэньня другога ўзроўняў пэнсійнай сыстэмы ў Беларусі прэзэнтаваў кіраўнік Навукова-дасьледніцкага цэнтру Мізэса Яраслаў Раманчук.
Па выніках дасьледваньняў была падрыхтаваная кніга «Пэнсійная сыстэма Беларусі: адносіны насельніцтва і сцэнары зьменаў», якая ў хуткім часе будзе апублікаваная на сайце Дасьледніцкага цэнтру ІПМ.