У Мінску 10 лістапада пройдзе першы латвійска-беларускі турыстычны бізнэс-форум.
Удзел у ім возьмуць міністр эканомікі Латвіі Арвілс Ашэрадэнс, дырэктар Латвійскага агенцтва інвестыцый і развіцця (LIAA) Андрыс Озалс, прадстаўнікі Міністэрства спорту і турызму Беларусі, Нацыянальнага агенцтва па турызме, а таксама беларускія і латвійскія бізнэсмены, паведамілі арганізатары.
Форум адбудзецца ў межах Дзён Латвіі, якія пройдуць з 10 лістапада па 10 снежня. На працягу месяца запланаваныя прэзентацыі латвійскіх харчовых тавараў у сетцы магазінаў «Рублёўскі» і «Прэстан», дзе можна будзе пакаштаваць і набыць прадукты латвійскай вытворчасці.
У межах праграмы Дзён Латвіі 11 лістапада адбудзецца майстар-клас латвійскіх кухараў, якія прадставяць латвійскую нацыянальную кухню.
15 лістапада адкрыецца выстава і пройдзе майстар-клас вядомага латвійскага дызайнера і ілюстратара моды Байбы Ладыгі, якая доўгі час жыла ў Кітаі.
23 лістапада пачне працаваць выстава пра Латвію беларускага фатографа Юліі Мацкевіч.
Паводле даных статыстыкі, у 2015 годзе агульны знешнегандлёвы абарот тавараў і паслуг Латвіі і Беларусі склаў 522,4 млн еўра. Такім чынам, Беларусь стала 15-м найважнейшым партнёрам Латвіі па знешнім гандлі. Беларускія экспартныя грузы традыцыйна займаюць другое месца ў агульным аб'ёме чыгуначных перавозак Латвіі. Аб'ём экспарту тавараў і паслуг у Беларусь склаў 190,9 млн еўра, або 1,3% ад агульнага аб'ёму экспарту Латвіі. У сваю чаргу, аб'ём імпарту тавараў і паслуг склаў 3 млрд 331,5 млн еўра, або 2,2% ад агульнага аб'ёму імпарту Латвіі.
Па інвестыцыях у асноўны капітал зарэгістраваных у Латвіі прадпрыемстваў на 1 кастрычніка 2015 года Беларусь заняла 22-е месца з агульным аб'ёмам інвестыцый у 21,4 млн еўра і 2.261 прадпрыемствам.
У асноўным Латвія экспартуе ў Беларусь прадукцыю хімічнай і харчовай прамысловасці, машыны і механізмы, транспартныя паслугі (паветраны, аўтатранспарт), турыстычныя, камерцыйныя паслугі (будаўнічыя, інфармацыйныя, кампутарныя, паслугі сувязі і гаспадарчай дзейнасці).
