У пятніцу ў Беларусь прыляціць прэм’ер-міністр Славакіі — ад 2010 года найвышэйшага ўзроўню візіт з ЕС
Як стала вядома «Нашай Ніве» з дыпламатычных колаў, 25 лістапада з аднадзённым візітам у Беларусь прыбудзе прэм’ер-міністр Славакіі Роберт Фіца.
У праграме візіта запланаваныя сустрэчы з вышэйшым кіраўніцтвам Беларусі, адкрыццё новага офіса пасольства (яно застанецца па ранейшым адрасе, але пераедзе на іншы паверх), ускладанне кветак на плошчы Перамогі, а таксама візіт у Віцебск, дзе дзейнічае славацкая фармацэўтычная кампанія «Націвіта».
Роберт Фіца ад 2012 з’яўляецца прэм’ер-міністрам Славакіі, ён прадстаўнік левай партыі «Курс — сацыяльная дэмакратыя».
Часта Фіца называюць прарасійскім палітыкам, але гэта не зусім так. Славакія вядзе палітыку, якая найперш прадугледжвае ўласныя інтарэсы. У 2014 годзе па тэрыторыі Славаччыны быў збудаваны газапровад для рэверсу газу ва Украіну, калі суседка аказалася ў стане канфлікту з Расіяй.
Візіт Фіца — гэта найбольш высокі візіт прадстаўніка Еўрасаюза ў Беларусь ад 2009—2010 гадоў, калі ў Мінск прыязджалі прэм’ер-міністр Італіі Сільвіа Берлусконі і прэзідэнтка Літвы Даля Грыбаўскайце.
Каментары