Джозэф Кей, фота naviny.by |
27 чэрвеня праваахоўныя органы Беларусі прад’явілі канчатковыя абвінавачанні затрыманаму 12 сакавіка амерыканцу Эмануілу Зельцэру. Яму ставіцца ў віну выкарыстанне заведама несапраўдных афіцыйных дакументаў, кантрабанда наркатычных сродкаў і камерцыйны шпіянаж. Яго сакратар грамадзянка Расіі Уладлена Функ (Брускова) абвінавачваецца ў выкарыстанні заведама несапраўдных афіцыйных дакументаў і ў камерцыйным шпіянажы.
Апрача таго, следчае ўпраўленне КДБ распачало крымінальную справу «па прыкметах камерцыйнага шпіянажу» ў дачыненні да Джозэфа Кея, які з’яўляўся кліентам Зельцэра.
«Я не ведаю, як мяне можна было абвінаваціць у шпіянажы, калі я ніколі ў Беларусі не быў. Шпіянаж на карысць каго? Выдумкі гэта ўсё», — заявіў Дж.Кей.
Паводле яго слоў, ён не разглядае варыянт прыезду ў Мінск, калі гэтага запатрабуе следства. Кей выказаў сумненне ў дэмакратычнасці палітыкі беларускіх уладаў і выказаў спадзяванне, што «Беларусь увойдзе ў лік нармальных еўрапейскіх краін, дзе выконваюцца законы».
У сваю чаргу кіраўнік прэс‑службы Камітэта дзяржаўнай бяспекі Беларусі Валерый Надтачаеў не стаў каментаваць працэдуру інфармавання падазроных і ходу следства.
Між тым адвакат Зельцэра і Функ Дзмітрый Гарачка паведаміў БелаПАН, што 30 чэрвеня ён і яго кліенты пачалі вывучэнне матэрыялаў справы, на што можа пайсці ад паўтара да двух тыдняў. Пасля гэтага матэрыялы будуць перададзены пракурору.