У 2015 і 2016 гг. перавозкі склалі 125 і 50 вагонаў адпаведна.
У 2017 годзе ў Беларусі будуць праводзіцца маштабныя сумесныя з Масквой вучэнні «Захад-2017».
«У ідэі і сцэнары вучэнняў будзе ўлічаная сітуацыя, звязаная з узмацненнем актыўнасці НАТА каля межаў Саюзнай дзяржавы», — адзначаў міністр абароны РФ Сяргей Шайгу на пачатку лістапада.
Аднак запланаваны рэзкі рост расійскіх вайсковых паставак у Беларусь выклікаў зразумелую занепакоенасць ва ўкраінскай прэсе.
Там выказваюць меркаванне, што гэта можа азначаць разгортванне ў Беларусі буйной расійскай групоўкі для агрэсіўных дзеянняў супраць Украіны ці нават краін Балтыі.
Фота: «Інтэрфакс-Украіна»
Таксама прыбыццё вялікай колькасці расійскіх войск можа быць выкарыстана для ўсталявання поўнага кантролю над тэрыторыяй самой Беларусі, лічыць дырэктар Цэнтра стратэгічных і замежнапалітычных даследаванняў Арсен Сівіцкі.
Па словах беларускага эксперта, планы Масквы сведчаць не проста пра ўдзел у маштабных вучэннях, а пра накіраванне ў Беларусь вялікай часткі расійскай 1-й Гвардзейскай танкавай арміі.
«Можна казаць пра ўскосныя сведчанні таго, што Крэмль у 2017 годзе збіраецца ажыццявіць дзеянні па стратэгічным разгортванні сваёй вайсковай групоўкі на беларускай тэрыторыі, што для Беларусі будзе азначаць вайсковае ўмяшальніцтва Расіі з мэтай усталявання поўнага ваеннага і палітычнага кантролю», — сказаў Сівіцкі ў каментары ўкраінскаму выданню.
Аналітык Беларускага інстытута стратэгічных даследаванняў (BISS) Дзяніс Мельянцоў прытрымліваецца іншага меркавання.
«Думаю, што такі меркаваны рост грузаперавозак звязаны з запланаванымі на наступны год маштабнымі вучэннямі «Захад-2017» на тэрыторыі нашай краіны. У 2013 годзе, калі таксама праводзіліся падобныя вучэнні, былі задзейнічаныя ў асноўным расійскія палігоны, гэтым можа патлумачыць невысокі грузапаток у 2013 годзе», — кажа эксперт.
Аглядальнік газеты «Беларускі рынак» Аляксандр Алесін, адзначае, што цяпер Расія не мае сіл і сродкаў для акупацыі новых вялікіх тэрыторый.
«Зашмат, канечне. Пытанне — якая тэхніка будзе перакідвацца. Імаверна, будуць перакідваць паўнавартасныя злучэнні, некалькі брыгад ці нават дывізій з тэхнікай. У адной танкавай дывізіі каля 250 танкаў, артылерыя, іншая бранятэхніка, бензавозы, грузавыя машыны. Можна меркаваць, што вучэнні будуць буйнымі», — кажа Алесін.
Эксперт лічыць, што будуць адпрацоўваць перакід і дзеянні войскаў, якія па супольных планах павінны прыбыць у Беларусь у выпадку пагрозы вайны на заходнім напрамку.
Аляксандр Алесін лічыць, што групоўка, якая б яна ні была, не зможа ўтрымаць Беларусь, а тым болей атакаваць Украіну і кантраляваць там акупаваныя тэрыторыі.
«Проста так, без міждзяржаўнага пагаднення, застацца яны не змогуць, а для акупацыі Беларусі такой колькасці «зялёных чалавечкаў» яўна недастаткова», — кажа ён.
«Лукашэнка ж і нават сам Пуцін цяпер не зацікаўленыя ва ўваходзе на новыя тэрыторыі Украіны. Пуціну б зараз бы статус-кво утрымаць на фоне Сірыі, магчымых праблем у Цэнтральнай Азіі. Утрымаць новую захопленую тэрыторыю будзе немагчыма», — лічыць эксперт.
Дзяніс Мельянцоў таксама лічыць вельмі малаімаверным цяпер «крымскі варыянт» для Беларусі.
«Для Расіі няма патрэбы далучаць Беларусь, бо збольшага яе інтарэсы тут і так забяспечаныя», — адзначае ён.
