Баевікі тэрарыстычнай арганізацыі «Ісламская дзяржава» днём 11 снежня ўсё ж захапілі сірыйскі горад Пальміра. Пра гэта паведамляе Associated Press са спасылкай на крыніцы ў Сірыі.
Па паведамленні агенцтва, урадавыя войскі ўцяклі з горада на поўдзень.
Паведамленне аб захопе горада распаўсюдзілі і СМІ, звязаныя з «Ісламскай дзяржавай».
Расійскія ж СМІ пішуць, што «сірыйскія войскі вядуць абарончыя баі».
«Нягледзячы на вялікія страты ў жывой сіле і тэхніцы, тэрарысты імкнуцца максімальна наблізіцца і замацавацца ўнутры горада, бо авіяцыя ВКС Расіі па жылых кварталах горада Пальміры ўдараў не наносіць», — заявілі расійскія вайскоўцы.
Раніцай 11 снежня Мінабароны РФ паведаміла, што сірыйскія войскі пры падтрымцы расійскай авіяцыі адбілі атаку баевікоў ІД на Пальміру. Паведамлялася, што за ноч расійскія паветрана-касмічныя сілы нанеслі па ваколіцах Пальміры 64 ўдары. Сцвярджалася, што пры гэтым было забіта больш за 300 баевікоў і знішчана 11 танкаў.
Папярэдні раз «Ісламская Дзяржава» захапіла Пальміру ў маі 2015 года. Тэрарысты ўзарвалі ў горадзе некалькі старажытных помнікаў, у тым ліку трыумфальную арку, храм бога Бэла і храм Баал-Шамін, а таксама пахавальныя вежы.
24 сакавіка 2016 года сірыйскія войскі занялі Пальміру пры падтрымцы расійскага экспедыцыйнага корпуса. Пасля гэтага ў горадзе прайшоў трыумфальны канцэрт з удзелам сябра Уладзіміра Пуціна, віяланчэліста Ралдугіна.
«Ісламская Дзяржава» — гэта прызнаная тэрарыстычнай арганізацыя, што хоча стварыць ісламскую дзяржаву на тэрыторыях былога Арабскага халіфата на момант яго найбольшай магутнасці.
Супраць яе ваююць як сілы Асада пры падтрымцы Расіі і Ірана, так і партызанскія атрады антыасадаўскай апазіцыі пры падтрымцы Катара і Турцыі.
