Прадстаўнікі польскіх апазіцыйных партый «Nowoczesna» і «Грамадзянская платформа» абвінавацілі варшаўскую паліцыю ва ўжыванні слезацечнага газу супраць мірных дэманстрантаў, якія мінулай ноччу блакавалі выезд з сейма, паведамляе агенцтва PAP.
Акцыя пратэсту ля будынка сейма пачалася пасля таго, як спікер ніжняй палаты парламента адхіліў ад удзелу ў паседжанні аднаго з апазіцыйных дэпутатаў.
Сейм абмяркоўваў бюджэт на 2017 год, аднак апазіцыянеры рэгулярна вярталіся ў сваіх выступах да пытання працы журналістаў у сейме, якую запланавана абмежаваць з 1 студзеня 2017 года года. Пасля рашэння спікера сейма адхіліць дэпутата апазіцыянеры на некалькі гадзін заблакавалі трыбуну — тады пасяджэнне было працягнута ў іншай зале.
Каля будынка сейма вечарам у пятніцу пачалі збірацца прадстаўнікі апазіцыйнага «Камітэта аховы дэмакратыі», якія вырашылі выступіць супраць абмежаванняў працы журналістаў у сейме. Пазней да іх далучылася і частка дэпутатаў, якія палічылі незаконным правядзенне пасяджэння сойма і прыняцце рашэнняў у іншай зале, не абсталяванай спецыяльнай сістэмай галасавання. Пратэстоўцы блакавалі выхады з сейма, замінаючы дэпутатам кіруючай партыі пакінуць будынак.
Акцыя пратэсту ля сейма працягвалася некалькі гадзін, у будынку ў гэты час знаходзіліся прэм'ер краіны Беата Шыдла і лідар кіруючай партыі Яраслаў Качыньскі.
Як заявілі ўдзельнікі акцыі, ноччу, калі Шыдла і Качыньскі вырашылі пакінуць будынак, на вуліцы быў выкарыстаны слезацечны газ, а паліцыя сілай разганяла дэманстрантаў, каб вызваліць дарогу, адзначае РАР.
Варшаўская паліцыя інфармацыю аб выкарыстанні газу не пацвердзіла. «Была выкарыстана толькі і выключна фізічная сіла і толькі ў адносінах да асоб, якія выбягалі пад машыны, ставячы пад пагрозу сваю бяспеку», — заявіў у эфіры тэлеканала TVN24 афіцыйны прадстаўнік паліцыі Варшавы Марыюш Мрозак.
