Рашэнне пра фінансаванне тэлеканала «Белсат» пакуль не прынятае, паведамілі БелаПАН у Міністэрстве замежных спраў Польшчы.
«У адказ на ваша пытанне паведамляем, што рашэнне адносна фінансавання тэлеканала «Белсат» яшчэ не прынятае», — заявілі ў прэс-службе МЗС у адказ на просьбу БелаПАН пракаментаваць будучыню тэлеканала.
Пра тое, што МЗС Польшчы скарачае на дзве траціны фінансаванне «Белсата», і пра магчымы перавод тэлеканала на рускамоўнае вяшчанне паведаміла 15 снежня польскаму выданню Wpolityce дырэктар «Белсата» Агнешка Рамашэўская-Гузы.
У Беларусі гэтая інфармацыя выклікала вялікі рэзананс. Актывісты дэмсіл ужо абвясцілі пра намер арганізаваць кампанію ў падтрымку «Белсата».
#белсатжыві: у сацсетках пачалася кампанія зваротаў да ўрада Польшчы. Але гучаць і процілеглыя галасы
Падчас візіту ў Мінск у маі гэтага года дырэктар «Белсата» распавяла БелаПАН, што тэлеканал ужо страціў больш за чвэрць агульнага аб'ёму фінансавання. «Мы страцілі фінансаванне з Заходняй Еўропы. У нас было шведскае, нарвежскае, канадскае фінансаванне, цяпер гэтага няма. Фінансаванне «Белсата» выключна польскае», — адзначыла Рамашэўска-Гузы.
Пры гэтым яна заўважыла, што забяспечваць поўны цыкл працы канала за сродкі беларускіх грамадзян наўрад ці магчыма, бо «збіраць з году ў год такое велізарнае фінансаванне вельмі складана».
Спадарожнікавы тэлеканал «Белсат» вяшчае на Беларусь з 10 снежня 2007 года. Ён створаны як структурнае падраздзяленне Польскага тэлебачання, рэдакцыя «Белсата» размяшчаецца ў Варшаве.
