Амерыканскія беспілотнікі коштам на мільёны даляраў аказаліся неэфектыўнымі.
Пра гэта заявіў дарадца начальніка Генеральнага штаба Узброеных сіл Украіны Натан Хазін, піша агенцтва Ройтэрз.
72 аналагавыя міні-беспілотнікі Raven RQ-11B, перададзеныя ўкраінскай арміі гэтым летам, так расчаравалі, што Хазін заявіў, што, калі б ягоная воля, ён бы іх адправіў назад у Амерыку.
«Ад самага пачатку рашэнне выкарыстоўваць гэтыя беспілотнікі было памылковым», — сказаў ён.
Баевікі аказаліся здольныя перахопліваць або глушыць іх.
«Комплексы з'яўляюцца аналагавымі, таму каналы і дадзеныя з'яўляюцца неабароненымі ад перахопу і глушэння сучаснымі сродкамі радыёэлектроннай барацьбы», — сказаў Хазін.
Ён дадаў, што яны таксама дазваляюць суперніку вылічваць украінскія пазіцыі, у іх кароткі тэрмін работы ад батарэі, і яны не здольныя выконваць сваю асноўную задачу — разведку артылерыйскіх пазіцый праціўніка.
Рашэнне аб пастаўках амерыканскіх дронаў ва Украіну доўга ўзгаднялася ў Вашынгтоне. Урэшце 38 украінскіх вайскоўцаў тры месяцы праходзілі навучанне карыстацца імі ў штаце Алабама.
Армія ЗША да гэтага часу выкарыстоўвае гэтыя беспілотнікі — праўда, мадэрнізаваныя да лічбавай версіі.
Гэтыя дроны вырабляюцца кампаніяй AeroVironment. Расійскія сілы аказаліся тэхнічна лепш падрыхтаванымі, чым меркавалі амерыканцы.
У выніку таго, што амерыканскія дроны не спрацоўваюць, украінцы вымушаныя працягваць самастойна збіраць беспілотнікі з кампанентаў, якія яны закупляюць у Аўстраліі, Чэхіі і Кітаі. Такія ўласнаручна зробленыя дроны абыходзяцца Украіне ў 20—25 тысяч даляраў, сказаў Хазін, прычым яны аказваюцца больш апгрэйджаныя, чым амерыканскія дроны коштам 160 тысяч за штуку, якія Украіна атрымлівае ў рамках праграмы вайсковай дапамогі.