Джонатан Мур |
«З нашага боку няма ніякіх абмежаванняў на колькасць дыпламатаў Беларусі ў ЗША», — сказаў ён.
Пры гэтым, як зазначыў Дж.Мур, пакуль «няма ніякіх сігналаў», што М.Хвастоў у найбліжэйшы час збіраецца вярнуцца ў Вашынгтон.
«Хоць мы не ставім ніякіх абмежаванняў па яго вяртанні», — падкрэсліў дыпламат.
Ён нагадаў, што згодна з патрабаваннем МЗС Беларусі, пасол ЗША ў Беларусі Карэн Сцюарт не можа вярнуцца ў Мінск да вяртання М.Хвастова ў Вашынгтон.
Дж.Мур таксама выказаў нязгоду з тым, што колькасць дыпламатаў у пасольствах дзвюх краін павінна рэгулявацца на парытэтнай аснове.
«Справа ў тым, што ў амерыканскіх пасольствах работа арганізавана па іншых прынцыпах, чым у пасольствах Беларусі, — патлумачыў ён.
— Адзін з прыкладаў — атрыманне віз. У нас ёсць патрабаванне асабістага інтэрв’ю і сканіравання пальцаў. А для атрымання візы Беларусі трэба па пошце адправіць пашпарт, анкету і грошы. Гэта больш простая працэдура».
Паводле слоў Дж.Мура, цяпер у пасольстве ЗША ў Мінску працуе пяць дыпламатаў. «І сёння няма ніякіх сігналаў, што іх колькасць можа быць дазволена павялічыць», — сказаў часовы павераны.
Як паведамляў БелаПАН, у лістападзе 2007 года ЗША ўвялі эканамічныя санкцыі ў адносінах да канцэрна «Белнафтахім» у сувязі з парушэннем правоў чалавека ў Беларусі. Двухбаковыя адносіны пагоршыліся ў сакавіку 2008 года пасля таго, як улады Беларусі адмовіліся вызваліць былога кандыдата ў прэзідэнты Аляксандра Казуліна (апошняга з шасці прызнаных міжнароднай супольнасцю палітзняволеных на той момант). Паслы Беларусі і ЗША былі адкліканыя з Вашынгтона і Мінска для кансультацый; штаты абодвух пасольстваў скарочаны да мінімуму.