Абмеркаванне пахавання ў Тайвані з удзелам 50 стрыптызёрак стала тэмай тыдня ў кітайскім інтэрнэце, піша ВВС.
Гэтая пахавальная працэсія стала ледзь не самым маляўнічым шоу ў гісторыі невялікага гарадка Чыаі. Фота Getty
У чацвер у горадзе Чыаі на поўдні правінцыі хавалі памерлага ў мінулым месяцы мясцовага палітычнага дзеяча Тунга Сыана. Па сеціве распаўсюдзілася відэа пахавальнай працэсіі з напаўголымі танцоркамі на дахах джыпаў.
Сям'я нябожчыка патлумачыла, што Тунга Сыан быў вельмі жыццелюбівым чалавекам і ўмеў атрымліваць задавальненне ад жыцця. Зладзіўшы яму такое пахаванне, сваякі хацелі аддаць даніну гэтай яго рысе, паведамляе мясцовая прэса.
Працэсія складалася з рознакаляровых джыпаў, з якіх неслася гучная музыка. За імі ішлі барабаншчыкі і маршыраваў адмысловы танцавальны калектыў. Запрошаныя акцёры былі апранутыя ў касцюмы бажкоў і гіганцкіх лялек.
Такой маляўнічай працэсіі ціхі правінцыйны гарадок не бачыў ніколі, пішуць мясцовыя СМІ.
Getty
Тунга Сыан займаўся палітыкай некалькі дзесяцігоддзяў, а ў апошнія гады ўзначальваў мясцовы савет. Ён быў вельмі папулярнай фігурай у палітычных колах Тайваня.
Ён памёр у 76 гадоў ад хваробы, назва якой не ўдакладняецца.
«За два дні да пахавання ён з'явіўся нам у сне і сказаў, што хоча менавіта такой цырымоніі», — сказаў у інтэрв'ю тайваньскай тэлекампаніі CTS брат нябожчыка.
Відэа з пахавання разышліся па кітайскім інтэрнэце і актыўна абмяркоўваюцца ў мясцовай сацыяльнай сетцы Weibo.
«Вось гэта пахаванне, вось дык яно», — напісаў адзін з карыстальнікаў.
«Падобна, што ў гэтай справе Тайвань на першым месцы», - падтрымаў іншы.
Многія карыстальнікі пахвалілі сям'ю памерлага за маляўнічае прадстаўленне, якое пацешыла жыхароў горада.
«Вось што значыць быць сапраўды народным выбраннікам», — сказаў адзін з жыхароў Чыаі.
«Мясцовыя жыхары просяць: калі ласка, памрыце яшчэ разок», — пажартаваў другі.
Удзел танцораў і нават стрыптызерак у пахаванні — не такая ўжо незвычайная практыка ў некаторых пластах тайваньскага грамадства, якія прытрымліваюцца паганскіх абрадаў і вераць у тое, што духаў неабходна забаўляць.
