У Брэсце 11 студзеня затрымалі групу неапаганцаў са «Славянскага адраджэння» і «Белага фронту». Трох мужчынаў падазраюць у захоўванні зброі, а таксама захоўванні і распаўсюдзе наркотыкаў. Паведамлялася, што яны арганізавалі канал кантрабанднай пастаўкі боепрыпасаў і састаўных частак для агнястрэльнай зброі з Украіны ў Беларусь.
Затрыманым пагражае да 13 гадоў.
Хто гэтыя людзі?
Адзін з затрыманых — 28-гадовы берасцеец Уладзіслаў Галабурда.
Яго затрымалі не дома, распавёў «Нашай Ніве» родны брат Уладзіслава.
«Улад выйшаў кудысьці і не прыйшоў увечары дадому. Прыйшла міліцыя. Быў вобшук, забралі камп’ютар яго», — кажа брат.
Пры гэтым браты шчыльных зносінаў не мелі, хоць і жылі ў адной кватэры. Па словах брата, Уладзіслаў нідзе не працаваў — толькі апошнім часам уладкаваўся на выпрабавальны тэрмін кудысьці. Куды канкрэтна — ён не ведае. Не ведае хлопец і сяброў Уладзіслава, якіх затрымалі разам з ім.
Валер Галабурда, бацька затрыманага, адмовіўся штосьці гаварыць.
Калі паглядзець на старонку Уладзіслава ў сацсетках, перад вачыма паўстае вобраз таго самага карыкатурнага «бандэраўца»: тут і нацысцкая сімволіка, і заклікі ў гонар Украіны, і здзекі з жартамі з сённяшняй Расіі і Пуціна, «ДНР» і «ЛНР», і допісы аб «славянскім адраджэнні».
«Колькі яшчэ стагоддзяў народу злізваць пыл з ботаў жыдоў!? Такіх як Мілон [Мілонаў] і яму падобных! Каб элементарна гэта зразумець, трэба было накапаць фактаў аб працэнтнай колькасці гэтых паразітаў у дзяржаўным апараце і пажадана зверыць за некалькі стагоддзяў», — піша Улад Галабурда на сваёй старонцы Укантакце.
Паведамляецца, што 11 студзеня затрымалі траіх маладзёнаў. Дваіх узялі з палічным. Хлопцы хацелі прадаць пісталет, які яны самі перарабілі з пнеўматычнага ў баявы.
У перадачы «Зона Х» выйшаў сюжэт, прысвечаны гэтай гісторыі. На відэа відаць жорсткае затрыманне аднаго з падазраваных.
Двум хлопцам — па 28 гадоў, аднаму — 26. Пры вобшуку ў іх знайшлі выбуховыя пакеты, порах, зарады для РПГ, псіхатропы, экстрэмісцкую літаратуру, паведаміў Аляксандр Лаўруковіч, начальнік аддзелу 6-га ўпраўлення ГУБАЗіК па Брэсцкай вобласці.
У выніку ў дачыненні да Уладзіслава Галабурды і ягонага паплечніка заведзеная крымінальная справа за незаконныя дзеянні ў дачыненні да агнястрэльнай зброі і незаконны абарот наркатычных сродкаў.
«Яны падазраюцца ў тым, што ў снежні 2016 года незаконна вырабілі з пнеўматычнага газабалоннага пісталета і складнікаў пісталета Макарава наразную агнястрэльную зброю — пісталет. Затым падследныя збылі яго з 6 патронамі, а таксама марыхуанай 23-гадоваму жыхару Брэста», — паведаміла «Нашай Ніве» Марына Дранькова, афіцыйны прадстаўнік Следчага камітэта па Брэсцкай вобласці.
Трэці — 26-гадовы — хлопец падазраецца ў незаконным абароце наркотыкаў.
Усе яны знаходзяцца пад вартай.
