Судан стаў для Беларусі адным з найважнейшых партнёраў на Афрыканскім кантыненце. Аб гэтым заявіў Аляксандр Лукашэнка сёння на перамовах у пашыраным складзе з прэзідэнтам Судана Амарам Хасанам Ахмедам аль-Башырам, паведамляе БелТА.
«Прыемна, што за мінулыя гады адносіны паміж дзвюма дзяржавамі набылі новую якасць. Судан стаў для нас адным з найважнейшых партнёраў на Афрыканскім кантыненце», - заявіў кіраўнік краіны.
Аляксандр Лукашэнка падкрэсліў, што Беларусь планамерна рэалізуе самастойную замежную палітыку зыходзячы з нацыянальных інтарэсаў, а не указанняў сусветных цэнтраў сілы. «Мы выступаем за развіццё адносін з усімі дзяржавамі ў духу ўзаемнай павагі, за неўмяшанне ва ўнутраныя справы і прызнанне разнастайнасці шляхоў развіцця», - сказаў ён.
Паводле слоў Лукашэнкі, мэта цяперашняга візіту ў Судан — замацаванне дасягнутых вынікаў і вызначэнне новых перспектыўных напрамкаў сумеснай дзейнасці.
