Пры ўрадзе Беларусі сфарміраваная камісія па выяўленні, вяртанні, сумесным выкарыстанні і ўвядзенні ў навуковы і культурны абарот культурных каштоўнасцяў, якія знаходзяцца па-за межамі краіны.
Рашэнне стварыць камісію замацаванае ў пастанове Савета міністраў № 25 ад 13 студзеня 2017 года, апублікаванай на сайце ўрада.
Сустаршынямі камісіі прызначаныя намеснік міністра замежных спраў Валянцін Рыбакоў і намеснік міністра культуры Аляксандр Яцко.
У склад групы таксама ўвайшлі старшыня Беларускага фонду культуры (БФК) Уладзімір Гілеп, старшыня камісіі «Вяртанне» пры БФК Адам Мальдзіс, намеснік міністра інфармацыі Аляксандр Карлюкевіч, намеснік міністра фінансаў Юрый Сільвестраў, дырэктар Цэнтра даследаванняў беларускай культуры, мовы і літаратуры Нацыянальнай акадэміі навук Аляксандр Лакотка, дырэктар Нацыянальнага гістарычнага архіва Зміцер Яцэвіч і намеснік начальніка галоўнага ўпраўлення шматбаковай дыпламатыі — начальнік упраўлення глабальнай палітыкі і гуманітарнага супрацоўніцтва МЗС Вадзім Пісарэвіч.
Гэтай жа пастановай урад зацвердзіў пералік з 12 дзяржаўных устаноў культуры, якія маюць асаблівае значэнне для захавання, развіцця і папулярызацыі беларускай нацыянальнай культуры. Пытанні іх рэарганізацыі і ліквідацыі зараз могуць разглядацца толькі са згоды Саўміна.
У спіс увайшлі тры мінскія тэатры — Нацыянальны акадэмічны тэатр імя Янкі Купалы, Нацыянальны акадэмічны драматычны тэатр імя Максіма Горкага, Нацыянальны акадэмічны Вялікі тэатр оперы і балета, а таксама віцебскі Нацыянальны акадэмічны драматычны тэатр імя Якуба Коласа.
Асаблівае значэнне ўрад надаў тром ВНУ — Беларускаму дзяржаўнаму ўніверсітэту культуры і мастацтваў, Беларускай дзяржаўнай акадэміі мастацтваў і Беларускай дзяржаўнай акадэміі музыкі, а таксама дзвюм музычным установам — Белдзяржфілармоніі і Нацыянальнаму акадэмічнаму народнаму хору імя Генадзя Цітовіча.
У пералік увайшлі дзве музейныя ўстановы — Нацыянальны мастацкі музей і Нацыянальны гістарычны музей.
Сваёй пастановай Саўмін таксама зацвердзіў абноўленую рэдакцыя правіл аказання паслуг па паказе фільмаў і ўдакладніў тэрмін дзеяння дазволаў на размяшчэнне вонкавай рэкламы. У цэлым прыняты дакумент уносіць папраўкі ў 16 дзейных пастаноў урада, а таксама адмяняе дзеянне 40 іншых пастаноў Саўміна.
Дакумент набывае моц 3 лютага.
