Прэзідэнт Барак Абама, які сёння пакідае пасаду кіраўніка ЗША, звярнуўся да суграмадзян з развітальным лістом, заклікаўшы іх працаваць над грамадзянскай адказнасцю і памятаць, што «Амерыка — гэта не праект аднаго чалавека». Ліст размешчаны на афіцыйным сайце Белага дома і называецца «Дзякуй»
Патрэбу напісаць ліст Абама патлумачыў традыцыяй, якую выконвалі прэзідэнты ЗША, — пакідаць для калегі, што змяняе яго на пасадзе кіраўніка краіны, ліст з пажаданнямі. Ліст павінны ўтрымліваць параду, як справіцца з адказнасцю, «якая звязаная з найвышэйшай пасадай у ЗША і лідарствам у вольным свеце». Аднак Абама спачатку вырашыў звярнуцца да амерыканцаў, піша rbc.ru.
«Бо ўсё, што я даведаўся за час маёй працы, я даведаўся ад вас. Вы зрабілі мяне лепшым прэзідэнтам, і вы зрабілі мяне лепшым чалавекам», — піша Абама.
Ён адзначыў, што на працягу васьмі гадоў народ ЗША быў для яго крыніцай дабрыні і надзеі, якая дапамагла яму знайсці ў сабе сілы. «Я бачыў як грамады і суседзі рупіліся адзін пра аднаго падчас найгоршага эканамічнага крызісу ў нашым жыцці», — адзначыў прэзідэнт ЗША.
Абама падкрэсліў, што натхняўся маладымі выпускнікамі і вайсковымі афіцэрамі, навукоўцамі. «Я бачыў амерыканцаў, чые жыцці былі выратаваны, бо яны, нарэшце, атрымалі доступ да медыцынскай дапамогі, і сем'і, чые жыцці змяніліся, паколькі іх шлюбы прызналі роўнымі нашым», — напісаў прэзідэнт ЗША ў развітальным лісце.
У лісце Абама адзначыў, што незалежна ад партыі амерыканцы павінны кінуць усе сілы на працу над грамадзянскай адказнасцю.
«І калі прагрэс здаецца павольным, памятайце: Амерыка — гэта не праект аднаго чалавека. Адзінае і самае магутнае слова ў нашай дэмакратыі — гэта слова «мы», — дадаў прэзідэнт ЗША. На заканчэнне Абама паўтарыў слоган сваёй выбарчай кампаніі: «Так, мы можам».
