Загадам Міністэрства інфармацыі ад 23 студзеня абмежаваны доступ да рэсурсу sputnikipogrom.com.
Кіраўнік «Спутніка і погрома» Ягор Прасвірнін.
Падставай паслужыла рашэнне суда Цэнтральнага раёна Мінска аб прызнанні экстрэмісцкімі матэрыяламі інфармацыйнай прадукцыі, размешчанай на гэтым інфармрэсурсе. Гэтае рашэнне суда было прынята з улікам экспертнага заключэння Рэспубліканскай экспертнай камісіі па ацэнцы інфармацыйнай прадукцыі на прадмет наяўнасці (адсутнасці) ў ёй прыкмет праявы экстрэмізму. У шэрагу матэрыялаў, апублікаваных на рэсурсе, утрымліваюцца прыкметы праявы экстрэмізму ў частцы інфармацыі, накіраванай на распальваньне нацыянальнай варожасці або розні, прапаганду перавагі альбо непаўнавартаснасці, на падставе іх нацыянальнай або моўнай прыналежнасці, а таксама гвалтоўнае змяненне канстытуцыйнага ладу Беларусі.
Апроч таго, у адпаведнасці з паведамленнем Міністэрства ўнутраных спраў абмежаваны доступ да двух інфармацыйных рэсурсаў, размешчаных у даменнай зоне.ru і.com, якія змяшчаюць паведамленні і матэрыялы, накіраваныя на незаконны абарот наркотыкаў.
Таксама на падставе пiсьмовага паведамлення Міністэрства антыманапольнага рэгулявання і гандлю абмежаваны доступ да інфармрэсурсу blogistar2016.ru за размяшчэнне неналежнай рэкламы прэпарата DiabetNot.
«Спутнік і погром» — гэта радыкальна праімперскі расійскі сайт. Яго аўтары адмаўляюць існаванне беларускай нацыі і патрабуюць анексіі Беларусі Расіяй.
