У Мінску затрыманы пенсіянер, які вырошчваў забароненыя грыбы.
Як паведамляе ГУУС Мінгарвыканкама, 61-гадовы мужчына, у мінулым доктар-псіхіятр, у сябе дома вырошчваў псілацыбінавыя грыбы. Яны ўтрымліваюць галюцынагенныя (псіхадэлічныя) рэчывы, а іх вырошчванне заканадаўча забаронена. Мужчыну затрымалі супрацоўнікі сталічнага наркакантролю.
У сябе дома пенсіянер арганізаваў сапраўдную лабараторыю, дзе мелася ўсё неабходнае для вырошчвання грыбоў. У кватэры аператыўнікі выявілі і канфіскавалі больш за 115 г сухіх грыбоў, таксама мелася 15 г марыхуаны, трансфарматар, кампрэсар, насенне, угнаенні.
Мужчына распавёў, што вырошчваў грыбы як для сябе, так і для збыту.
У дачыненні да яго цяпер заведзеная справа па ч. 3 арт. 328 КК (незаконны абарот наркатычных сродкаў, псіхатропных рэчываў, іх прэкурсораў і аналагаў).
