Амаль два месяцы Мінабароны Расіі не давала адказу на афіцыйны запыт расійскіх журналістаў, чаму ў 2017 г. Міністэрства абароны РФ замовіла 4162 вагоны для перавозак войскаў і вайсковых грузаў па Беларусі.
Атрымлівалася, што гэта было ў шмат разоў болей, чым папярэдне агучаныя звесткі за іншыя гады, калі праводзіліся сумесныя расійска-беларускія вучэнні.
«Аб'ем вайсковых чыгуначных перавозак 2017 года параўнальны з аб'ёмам перавозак падчас праведзеных на тэрыторыі Беларусі вучэнняў папярэдніх гадоў: «Захад-2009 — больш за 6 тысяч вагонаў, «Захад-2013» — амаль 2,5 тысячы вагонаў», — гаворыцца ў адказе Мінабароны РФ.
Ведамства ўдакладніла, што замоўленыя «каля 4000 вагонаў» — перавозкі ў абодва бакі: 2000 вагонаў ідуць у раён правядзення вучэнняў, 2000 — у адваротны бок.
Рэзкі рост расійскіх вайсковых паставак у Беларусь выклікаў зразумелую занепакоенасць у прэсе, згодна з меркаваннем якой гэта можа азначаць разгортванне ў Беларусі буйной расійскай групіроўкі для агрэсіўных дзеянняў супраць Беларусі, Украіны ці нават краін Балтыі.
Беларускія эксперты выказвалі розныя меркаванні з нагоды вучэнняў.
«Свой адказ Міністэрства абароны РФ пісала 55 дзён. Гэты ўзор унушальных штабных фармуліровак утрымлівае ўсяго чатыры сказы… Я магу толькі гадаць пра тое, як наш запыт рухаўся ў нетрах вайсковага ведамства», — адзначыў журналіст расійскай «Новой газеты».
Вучэнні «Захад-2017» адбудуцца восенню 2017 года, і, як чакаецца, будуць вельмі вялікімі па маштабах - могуць пераўзыходзіць вучэнні «Каўказ-2016», у якіх удзельнічалі 125 000 вайскоўцаў і 97 тысяч рэзэрвістаў, пісала раней расійскае «Независимое военное обозрение».
Цяпер чытаюць
Спальныя месцы ў «Мінск-Свеце» могуць выклікаць клаўстрафобію. Як эканомяць прастору ў сучасных кватэрах-студыях10
Каментары