З пагаршэннем эканамічнага становішча беларусаў яны ўсё больш падтрымліваюць паскарэнне рынкавых рэформаў. Пра гэта сведчаць звесткі апытання Беларускай аналітычнай майстэрні Андрэя Вардамацкага (BAW, Варшава), якімі даследчык падзяліўся з TUT.BY.
У апошнім апытанні ў снежні 2016 года ўдзельнічалі 1048 чалавек, людзей апытвалі ў індывідуальных інтэрв'ю па месцы жыхарства.
У параўнанні з 2015 годам, калі эканамічную сітуацыю ў краіне як «дрэнную» ацанілі 42,7%, да канца 2016 года такіх стала 55%.
Пагаршэнне эканамічнага самаадчування фіксуецца ўжо тры гады, адзначае Вардамацкі.
Аналагічны спад назіраецца і ў ацэнцы становішча ўласнай сям'і. 36,1% беларусаў ацэньваюць яго як «дрэннае» ў 2015 годзе, 44,8% — у 2016 годзе.
Пры гэтым найгоршыя ацэнкі даюць людзі актыўнага эканамічнага ўзросту.
У 2016 годзе ў параўнанні з 2014-м прыкметна вырасла колькасць прыхільнікаў хутчэйшых рынкавых рэформаў за кошт падзення ліку тых, хто падтрымаў бы паступовы пераход да рынку.
З якім з пунктаў гледжання з нагоды эканамічных рэформаў вы б хутчэй пагадзіліся?
Снежань 2014 | Снежань 2016 | |
Трэба як мага хутчэй завяршыць пераход да рынкавай эканомікі | 22,9 | 31,2 |
Да рынкавай эканомікі варта пераходзіць паступова | 46,5 | 29,9 |
Беларусі не патрэбныя рынкавыя рэформы | 13,5 | 16,7 |
Цяжка адказаць | 16,3 | 18,8 |
Адмовіліся адказваць | 0,8 | 3,4 |
Рост запыту на рэформы адбіўся і ў адказах на пытанне, якое BAW задала беларусам перад парламенцкімі выбарамі 2016 года. З тых, хто збіраўся галасаваць, 52,1% казалі, што выберуць таго, хто прадстаўляе альтэрнатыўныя шляхі развіцця, а 27,9% - за тых, хто падтрымлівае цяперашні палітычны і эканамічны курс.
Нагадаем, што паводле афіцыйных вынікаў выбараў з 110 дэпутатаў толькі два — Ганна Канапацкая і Алена Анісім — лічацца альтэрнатыўнымі.