09.03.2017 / 09:33

Airbus пакажа канцэпт лятальнага аўтамабіля на Жэнеўскім аўтасалоне 4

Еўрапейская авіябудаўнічая кампанія Airbus прадставіць на Жэнеўскім аўтасалоне лятальны аўтамабіль, паведамляе Associated Press.

Мадэль Pop.Up — модульны транспартны сродак, які працуе на электрычнасці без шкодных выкідаў у атмасферу. Лятальны аўтамабіль зможа вырашыць праблемы затораў у вялікіх гарадах.

Модульная канструкцыя прадугледжвае магчымасці перасоўвання як па зямлі, так і па паветры. Пасажырская капсула можа ехаць па дарозе, а потым далучыцца да 4-прапелернага паветранага транспартнага модуля, што дазволіць пасажырам, якія спяшаюцца, пакінуць месца затору на дарозе паветраным шляхам.

Прадстаўнік Airbus Маціяс Томсэн адзначыў, што авіябудаўнічы гігант плануе ўкараніць гэтыя транспартныя сродкі ўжо праз 5—10 гадоў. Галоўная перашкода — неабходнасць стварэння спецыяльнай гарадской інфраструктуры, а таксама правілаў, якія б рэгулявалі эксплуатацыю такіх лятальных аўтамабіляў у гарадскіх умовах. Гэта супольная праца для ўрбаністаў, планіроўшчыкаў і юрыстаў, таму ў найбліжэйшыя 5 гадоў не варта чакаць з’яўлення такіх машын на вуліцах.

Pop.Up выкарыстоўвае сістэму штучнага інтэлекту, якая дазваляе выбраць пасажыру пункт прызначэння, прапаноўвае альтэрнатыўныя сцэнарыі і працуе з сацыяльнымі сеткамі карыстальніка. Пасажыр можа планаваць сваё падарожжа пры дапамозе мабільнага дадатка.

У Airbus адзначылі, што стварэнне падобных транспартных сродкаў немагчыма без кааперацыі розных галін прамысловасці і тэхналогій.

Жэнеўскі аўтасалон праходзіць з 9 па 19 сакавіка. На ім будзе прадстаўлена каля 900 мадэляў ад 180 удзельнікаў выставы.

Максім Маханькоў

0
Юзік / Адказаць
09.03.2017 / 13:43
Рэд. Вытрымка з тлумачальнага слоўніка БМ: Лятальны -- які служыць, прыстасаваны для лятання. Лятальны апарат.
0
Valadzimir / Адказаць
09.03.2017 / 22:47
// Рэд. Вытрымка з тлумачальнага слоўніка БМ: Лятальны -- які служыць, прыстасаваны для лятання. Лятальны апарат. // ----------------------------------------------------------------------------- Неправільна, паважаная рэдакцыя. Калі казаць пра "летательный аппарат", то замест не вельмі ўдалага "лятальны", напэўна, усё ж лепш гучала б "лЁтальны", бо па-беларуску "летать" - лятаць і лётаць. Але ў дадзеным выпадку гаворка йдзе не пра "летательный аппарат", і не пра "летательный автомобиль", а пра "летающий автомобиль" - апарат, які прызначаны для язды па зямлі, але які яшчэ можа й лётаць! (Амфібія - гэта "плавающий автомобиль"). Гэта значыцца па-беларуску будзе "лятаючы" ці "лётаючы", альбо "лятучы" аўтамабіль (Руска-беларускі слоўнік). А ў скарочаным выглядзе атрымліваецца такі неалагізм: па-беларуску "ЛЁТАМОБ" ("ЛЯТАМОБ"), па-расейску "ЛЕТОМОБ".... Альбо наадварот, і здаецца, так лепей - "МОБАЛЁТ (МАБАЛЁТ)", а па-расейску "МОБОЛЁТ".
0
Вайтук / Адказаць
10.03.2017 / 12:15
Valadzimir, 2. У расейскае мове дзеепрыслоўі (рас. - летающий) пачалі актыўна займаць месцы прыметнікаў (рас. - летательный). З-за глябальнага уплыву расейскае мовы на нашую, беларускую мову, на нашую мову пачынаюць распаўсюджвацца гэная ж самыя працэсы. І гэта ня ёсьць добра! Наконт, слова "лётальны": вычыце правіла "Правапіс Е,Ё,Я". У першым складзе перад націскам Е,Ё ператвараюцца ў Я (прыклад: зялёны – зеляніна - зеленаваты).
Паказаць усе каментары/ 4 /
Каб пакінуць каментар, калі ласка, актывуйце JavaScript у наладах свайго браўзеру