У чацвер, 9 сакавіка лідары ЭС на саміце ў Бруселі пераабралі Дональда Туска на пасаду прэзідэнта Еўрапейскай рады, паведамляе Радыё Польшча.
Getty
Такім чынам, польскі палітык будзе займаць гэтую пасаду бліжэйшыя два з паловай гады.
Як паведамляе агенцтва AFP, спасылаючыся на свае крыніцы, за кандыдатуру былога польскага прэм'ера прагаласавалі 27 лідараў краін-сяброў ЕС. Супраць перавыбрання Дональда Туска выступіў польскі ўрад.
На сваёй старонцы ў твітары Дональд Туск падзякаваў усім за падтрымку.
«Дзякую за давер і станоўчую ацэнку. Я зраблю ўсё магчымае, каб зрабіць ЕС лепш», — напісаў кіраўнік Еўрарады.
Польшча доўгі час выступала супраць перавыбрання Дональда Туска на гэтую пасаду. У суботу 4 сакавіка Варшава афіцыйна вылучыла свайго кандыдата — дэпутата Еўрапарламента Яцэка Сарыюш-Вольскага.
Лідэр «Права і справядлівасьці» Яраслаў Качыньскі заяўляў, што Туск павінен несці адказнасць за катастрофу прэзідэнцкага самалёта пад Смаленскам. Ён таксама абвінавачваў Туска ў прыняцці рашэнняў, «надзвычай шкодных для Польшчы».