Масавыя пратэсты ў Маладзечне: улады адказалі хапуном лідараў апазіцыі АНЛАЙН
Акцыя ў Маладзечне стала тэстам, ці задаволіла людзей прыпыненне дэкрэта, ці яны настроеныя пратэставаць далей. Рэпартаж адтуль вяла карэспандэнтка «НН» Настасся Роўда.
На «марш недармаедаў» у Маладзечне сабралася да 1000 чалавек. Акцыя стала тэстам, ці задаволіла людзей прыпыненне дэкрэта №3. Удзельнікі акцыі запатрабавалі поўнай адмены дэкрэта.
Да людзей на плошчы выйшаў старшыня райвыканкама Яхнавец, які прапанаваў дэлегаваць сваіх прадстаўнікоў у будынак выканкама.
Людзі ў адказ запатрабавалі, каб выключыў гукаўзмацняльнікі, праз якія ішло папярэджанне МНС пра пажары.
Яхнавец у выніку сышоў. Людзі пачалі крычаць «Ганьба», а затым прайшлі шэсцем па вуліцы Прытыцкага да будынка падатковай інспекцыі, дзе на дзвярах прыклеілі рэзалюцыю з патрабаваннем адмяніць дэкрэт. «Нам трэба датэрмінова правесці выбары! А каб правесці чэсныя выбары, трэба памяняць Цэнтрвыбаркам, Ярмошыну», — сказаў карэспандэнтам адзін з удзельнікаў шэсця, прадпрымальнік Аляксандр.
Па ацэнках праваабаронцаў, у мітынгу на плошчы ўзялі ўдзел 500 чалавек, у шэсці — да 1000 чалавек.
Людзі скандавалі «Жыве Беларусь!» і «Уладу — народу!».
Ніколі раней у Маладзечне не праходзіла такіх масавых акцый пратэсту.
20:59
Пасля акцыі ў Маладзечне затрыманыя лідар АГП Анатоль Лябедзька, сустаршыня БХД Віталь Рымашэўскі, старшыня руху «За свабоду» Юрась Губарэвіч, сацыял-дэмакрат Алесь Абрамовіч, актывістка БХД Вольга Кавалькова і журналіст БелаПАН Сяргей Каралевіч.
Лябедзька трансляваў затрыманне ў сваім фэйсбуку. Нейкі час яго, Губарэвіча і Каралевіча суправаджалі людзі ў цывільным. Потым накінуліся і сталі збіваць. Затрыманне адбывалася вельмі брутальна.
«У Маладзечанскім РАУС. Затрыманне у лепшых традыцыях… Закінулі у бус, тварам у падлогу. Зараз ідзе разбіральніцтва». З боку міліцыі галоўны — Кісель.», — напісаў Губарэвіч.
Лябедзька потым здолеў весці трансляцыю з РУУС у фэйсбуку, потым, здаецца, зноў пачалося збіццё і трансляцыя спынілася.
«Мяне закінулі, па Губарэвічы патапталіся, потым Каралевіча закінулі», — паведамляў Лябедзька ў фэйсбуку.
«Вы можаце патлумачыць, чаму я затраманы», — спытаўся Лябедзька, і трансляцыя адключылася.
«Закінулі ў бус, тварам у падлогу, з грубай фізічнай сілай. Адвезлі ў пастарунак. Хутчэй за ўсё, нейкая група з Менска гэтым займалася, бо іх твары я не аднойчы бачыў на менскіх мерапрыемствах. Нам нічога не сказалі, не папярэдзілі, проста, як злачынцаў, падляцелі ззаду, адчынілі дзверы, пазакідвалі, селі на плечы на нас і паехалі», — сказаў Юрась Губарэвіч карэспандэнту Свабоды.
Юрась Губарэвіч назваў гэтыя дзеянні міліцыі «спробай запалохвання».
— Я цяпер знаходжуся ў кабінеце з супрацоўнікам міліцыі, які будзе складаць пратакол. Чым гэта завершыцца, я не ведаю. Але ёсць верагоднасць, што мы тут заначуем да суда. А з улікам выходных дзён — да панядзелка. Тут цяжка прагназаваць.
— То бок вы цяпер у Маладзечанскім РАУС?
— Напэўна, так, бо цяжка было зразумець. Заводзілі тварам у падлогу, накінуўшы капюшоны на галаву. І так выводзілі з аўтобуса, таму ніякай шыльды я не разгледзеў.
Начальнік міліцыі Маладзечна Валянцін Асіповіч адмовіўся каментаваць журналістам арышты і загадаў пакінуць пастарунак.
Нікога ва ўнутр будынка не пускаюць.
***
Ілля Бондар паведаміў пра затрыманне пяці чалавек. «Ехалі ў таксі з мітынга. спыніла ДАІ і бус. Затрымалі пяць чалавек. Сярод іх Яўген Радкевіч і Ягор Аўсяннікаў»
***
Таксама пасля акцыі быў затрыманы малады чалавек з арафаткай на твары. Паводле назіральнікаў БХК, яго жорстка запіхнулі ў міліцэйскую машыну. Хлопца завуць Дзяніс, яму 16 год.
19:24
З'явілася інфармацыя пра першыя затрыманні ў Маладзечне. Праваабаронцы паведамляюць, што затрымалі хлопца з арафаткай на твары. Яго зацягнулі ў міліцэйскую машыну.
19:08
Акцыя скончана, людзі разыходзяцца. Міліцыі асабліва не бачна. Ахвотныя падпісваюцца за адмену дэкрэту №3.
19:07
19:05
«Давялі народ да галечы, выць хочацца, — кажа Надзея. — Мне да пенсіі пара гадоў, работы няма. Дачка маладая, 23 гады, працы таксама няма. Мой муж працуе, вось і выжываем толькі таму, што сям'я».
19:04
19:01
«Я беспрацоўная, ліст не атрымала, але ў спісах ёсць. Хутка хлеба не будзе з'есці, а тут яшчэ гэты падатак», — абураецца спадарыня Ларыса.
18:56
18:55
18:51
Шэсце амаль дайшло да вакзала, аўтамабілісты сігналяць.
Па ацэнках назіральнікаў, у акцыі бяруць удзел 500-600 чалавек. Зараз збіраюцца ісці маршам па вуліцы Прытыцкага да падатковай.
18:38
Зноў плошча скандуе «Жыве Беларусь». Зачытваюць тэкст рэзалюцыі, яго ўхваляюць.
18:36
Мужчына кажа, што ўлады не даюць жыцця ні малому, ні сярэдняму бізнэсу, а камуналка расце.
18:35
«У мяне стаж працы — 46 гадоў, а я жыву ў галечы», — кажа жанчына.
18:28
Аляксандр прыйшоў з жонкай Кацярынай і двума малымі дзецьмі. Дэкрэт іх не закрануў, але пад яго дзеянне патрапіў яго брат і дзядзька. Мужчына прыйшоў з салідарнасці з усімі людзьмі, якія выйшлі на плошчы ў розных беларускіх гарадах.
18:21
«Мы прыйшлі, бо надакучыла так жыць. Нам не прыйшоў ліст, але праца то ёсць, то няма, мы супраць дэкрэта», — кажуць Святлана і Зміцер.
18:18
18:18
«Слава Генадзю Карпенку» (які ў пачатку 1990-х быў мэрам горада), — скандуюць. Кажуць, што горад варты такога мэра, а сённяшнім кіраўнікам: «Ганьба». Ахвотна падпісваюцца за поўную адмену дэкрэта.
18:16
18:14
Людзі скандуюць: «Яхнавец» (гэта старшыня райвыканкама), «Жыве Беларусь».
18:13
Губарэвіч заклікае чыноўнікаў выйсці пагаварыць з народам.
18:11
Выступае старшыня руху «За свабоду» Юрась Губарэвіч.
18:11
Перад прысутнымі выступілі лідар БХД Віталь Рымашэўскі і старшыня АГП Анатоль Лябедзька. Апошні заклікаў прыязджаць на «Марш недармаедаў» у Мінск 15 сакавіка.
Зараз на Цэнтральнай плошчы ў Маладзечне 300-400 чалавек.
18:09
Людзі гукаюць: «Жыве Беларусь».
18:09
18:05
Ужо сабралася пад сотню чалавек.
17:57
17:55
17:54
Двое міліцыянтаў праходзяць з рацыяй уздоўж плошчы.
17:50
Папярэджанні ад МНС усё яшчэ гучаць, людзей становіцца больш, але групуюцца ля плошчы.
17:49
17:45
На плошчы і вакол яе стаяць 40-50 чалавек. Аднак пакуль што не зразумела, ці яны прыйшлі на акцыю, ці проста назіраюць збоку.
17:44
Людзі збіраюцца вакол плошчы, стаяць ля кавярні, што побач.
17:42
17:41
«Цяжка сказаць, ці выйдуць людзі, бо напярэдадні Лукашэнка прыпыніў дзеянне дэкрэта і збавіў градус напружання ў грамадстве. Напэўна, усе ў горадзе ведаюць, што сёння будзе акцыя. Пачакаем, ці выйдуць. Ужо відавочна, што людзі збіраюцца, толькі стаяць групкамі па ўсёй плошчы, а яна вялікая», — кажа Капуцкі.
17:37
На Цэнтральнай плошчы ў Маладзечне людзей не шмат. Прысутнічае маладзечанскі праваабаронца Алесь Капуцкі.
17:30
17:28
Агароджу на Цэнтральнай плошчы цалкам прыбралі. На ўсю плошчу гучыць папярэджанне МНС пра небяспеку пажараў.
17:21
Чытачы ў каментарах паведамляюць, што ў музычным каледжы імя Агінскага студэнтаў закрылі ў аўдыторыях і не выпускаюць.
Напярэдадні на плошчы паставілі агароджы, але сёння іх знялі.
Сёння днём на плошчы мянялі плітку
У лютым-сакавіку аналагічныя акцыі пракаціліся па гарадах Беларусі.
Напярэдадні Лукашэнка, фактычна, прыпыніў дзеянне дэкрэта №3 на год. Грамадскія дзеячы заявілі, што патрабуюць поўнай адмены дэкрэта. Акцыя ў Маладзечне можа паказаць, ці задаволіла людзей прыпыненне дэкрэта ці яны настроеныя пратэставаць далей.
У Маладзечне дазволу на мітынг ніхто не прасіў, акцыя пройдзе ў форме народнага сходу.
У суботу аналагічная акцыя павінна прайсці ў Пінску (12:00), у нядзелю — у Бабруйску, Оршы і Рагачове. 15 сакавіка запланаваны Марш недармаедаў у Мінску. Мінгарвыканкам даў дазвол на шэсце, але адправіў па звыклым маршруце ад Акадэміі навук да Бангалор. Арганізатары заявілі, што будуць прымаць рашэнне непасрэдна на месцы.
Каментары