У Рагачове на плошчу выйшла каля 400 чалавек АНЛАЙН

Жыхары Рагачова пакрысе разыходзяцца. Пратэст быў на дзіва шматлікім, у пікавыя моманты ён дасягаў 400 чалавек. Аднак у адсутнасць лідараў людзі проста выгаворваліся на камеры журналістаў і размаўлялі між сабой.

На месцы падзей у Рагачове працавала карэспандэнтка «Нашай Нівы» Кацярына Карпіцкая. Дзякуй за ўвагу!

Міхаіл сам працаваў на прадпрыемстве па вырабе напояў. Сыходзіў на пенсію пяць гадоў таму, там былі прыстойныя заробкі, а цяпер вытворчасць у заняпадзе. Ён лічыць, што вінаватыя людзі ва ўладзе, якія нічога не разумеюць у эканоміцы.

Жыхар Рагачова Міхаіл кажа, што цярплівасць народа перапоўненая: спачатку падатак на дарогі, потым паднялі пенсійны ўзрост, пакрыўдзілі дэкрэтніц і тых хто у войску — гэтыя гады не ўваходзяць ў стаж… «Беларусы талерантныя, але не настолькі», — падсумоўвае ён.

Міхаіл на пенсіі, але прыйшоў дзеля дзяцей і унукаў.

Абмяркоўваюць Дразды і тое, што ў нас выразны падзел на вярхі і нізы. Адна жанчына ўзгадала Украіну, кажа, што не хоча такога, але яе адразу заткнулі: тут іншая сітуацыя: «У нас з людзей робяць дармаедаў, прычым з добрых людзей! Тых, хто піў і не працаваў раней, — іх нічога не зменіць». Прапаноўваюць падатак на багатых, а не тых, хто без працы.

Набор лозунгаў стандартны: «Жыве Беларусь», «Верым можам пераможам!» Але крычаць не надта гучна, а некаторыя і зусім маўчаць.

Вікторыя, дзяўчына ў бейсболцы, баіцца выйсці з дэкрэтнага: «Я не знайду працу, і што, у мяне забяруць дзяцей? Я ж іх не змагу пракарміць!»

Грамадскае абмеркаванне працягваецца без планаў і сцэнароў. Але некаторыя пачынаюць разыходзіцца.

Жанчыны абураюцца, чаму Лукашэнка да іх не прыязджае, каб усё пабачыць на свае вочы: «будаўнічыя арганізацыі зачыніліся, кансервны завод таксама, піўны таксама. Дзе працаваць?»

Малыя ў тэме. Кажуць, што працы няма ў бацькоў і іншых сваякоў. Запэўніваюць, што сочаць за навінамі ў інтэрнэце і ведаюць усё пра дэкрэт. А тэлебачанне, маўляў, хлусіць.

На пратэст прыехалі графіцісты з Signal, якія размалявалі горад. Хочуць падтрымаць землякоў, бо адзін з іх — Алег Ларычаў з Мозыра

«Мы не апазіцыя, нас вывеў сюды Лукашэнка!» — крычаць людзі.

На плошчы шмат прадпрымальнікаў, якіх душаць падаткамі. Кажуць, што прыйшлі супраць усёй дурной сістэмы.

Лідара няма. Але людзі лічаць, што гэта нават добра, таму што лідараў бы адразу пасадзілі.

Насельніцтва Рагачова — каля 35 тысяч чалавек. Таму 400 чалавек, якія выйшлі на плошчу, — досыць шмат.

«Не Дэкрэту №3, Лукашэнка — сыходзь!» — пачынае скандзіраваць натоўп.

Карэспандэнтка «НН» перадае, што колькасць удзельнікаў акцыі набліжаецца да 400 чалавек. Калоны нарэшце ўз'ядналіся на цэнтральнай плошчы горада.

Сталая жанчына ў фіялетавай шапцы аказалася адна супраць усіх. Яны падтрымлівае існуючую ўладу і заклікае не дапусціць Майдан у Беларусі. А ўсе астатнія патрабуюць рэформаў.

Частка людзей ужо на плошчы, іншая калона рушыць да райвыканкама.

Міліцыянты зноў у гукаўзмацняльнік папярэдзілі жыхароў Рагачова, каб тыя не парушалі грамадскі парадак. Аднак акцыя праходзіць вельмі ціха. Людзі купкамі абмяркоўваюць свае праблемы.

Лідзія прыйшла за свайго сына, бо ён не знайшоў тут працы, і з'ехаў у Расію. А цяпер атрымаў «лісты шчасця». Ён хоча дадому, але не зможа сябе тут пракарміць, наракае жанчына.

300 чалавек на акцыі пратэсту — нечуваныя лічбы для Рагачова. Людзі самі не вераць, што сабралася так шмат людзей.

Людзі рушаць на плошчу. Міліцыя едзе побач.

Пенсіянерка Алена скардзіцца, што не хапае пенсіі, каб выпісаць дровы і пракарміць трох катоў. «Людзей зрабілі скотам у цэнтры Еўропы», — кажа яна.

Прыйшла міліцыя, каб нагадаць, што прымаць удзел у акцыях нельга. Людзі крычаць, што проста жадаюць выгаварыцца. І кажуць, што міліцыя можа апынуцца на іх месцы. У выніку міліцэйскі начальнік Аляксей Серабро дазволіў прысутным прайсці да плошчы.

Людзі смяюцца над заробкам у 500 даляраў, кажуць, што толькі дэпутаты столькі атрымліваюць.