Заснавальнік былога «Белага легіёна» Сяргей Чыслаў паведаміў аб затрыманні свайго брата, кіраўніка клуба «Патрыёт» Мікалая Міхалькова.
komkur.info
Паводле ягоных звестак, 23 сакавіка Мікалая Міхалькова запрасілі на гутарку ў КДБ Бабруйска. З тых часоў на сувязь ён не выходзіў, а яго машына знаходзіцца каля будынку ведамства.
Мікалай Міхалькоў — кіраўнік вайскова-спартыўнага клуба «Патрыёт» на базе Цэнтра творчасці дзяцей і моладзі ў Бабруйску. Сам Міхалькоў — у мінулым кадравы афіцэр, які служыў у адной з паветрана-дэсантных брыгад спецыяльнага прызначэння.
Яго сын, вайсковец Ян Міхалькоў, быў затрыманы 21 сакавіка па справе аб «падрыхтоўцы масавых беспарадкаў».
КДБ заявіў, што ўсяго па справе затрымана 26 чалавек.
Масавыя затрыманні па ўсёй краіне, нагадаем, пачаліся ўвечары 21 сакавіка. За некалькі гадзін да гэтага Аляксандр Лукашэнка заявіў, што ў Беларусі затрымалі баевікоў, якія рыхтавалі правакацыю са зброяй.
Затрыманні ж увогуле пачаліся 3 сакавіка — калі ў розных гарадах краіны распачаліся масавыя выступы супраць эканамічнай палітыкі ўладаў.
Праваабаронцы лічаць кампанію арыштаў скіраванай на застрашванне грамадства. Яны называюць абвінавачванні фальшывымі, а заявы аб датычнасці замежных грамадзян — фэйкам. А эксперты назвалі паказаную «сканфіскаваную» зброю або паляўнічай, або страйкбольнай.
