Кіраўнік Каталіцкага касцёла Беларусі, Мітрапаліт Мінска-Магілёўскі, арцыбіскуп Тадэвуш Кандрусевіч у інтэрвію брытанскаму Catholic Herald заявіў пра планы стварэньня ў Беларусі каталіцкага ўніверсітэта.
Кандрусевіч шукаў падтрымкі гэтай ідэі ў час візыту ў ЗША 20—25 сакавіка. Паводле мітрапаліта, яго часта запрашаюць выступіць у свецкіх універсітэтах на тэмы маральных каштоўнасьцяў і этыкі:
«Нашае грамадства адчувае гэтую неабходнасць. Яны кажуць: «Калі ласка, прыходзьце», — патлумачыў Кандрусевіч.
Ён сказаў, што ў Мінску выстаўлены на продаж універсітэт, ёсць патэнцыял для яго набыцця пры ўмове, што цяперашнія студэнты таго ўніверсітэта будуць мець магчымасць скончыць курс навучання.
Ён не ўпэўнены, што такі ўніверсітэт будзе мець поспех, але кажа: «Мы спрабуем зрушыць камень».
Рашэнне аб стварэнні ў Беларусі багаслоўскай акадэміі імя святога Яна Паўла ІІ было прынятае ў 2014 годзе, акадэмія была зарэгістраваная ў 2015-м, але дагэтуль не мае свайго будынка.
