З-за напружанасці на фоне паўночнакарэйскіх ракетных запускаў ударная групоўка амерыканскага флоту на чале з атамным авіяносцам «Карл Вінсан» атрымала загад адправіцца ў заходнюю частку Ціхага акіяна.
«Пагрозай нумар адзін у рэгіёне застаецца Паўночная Карэя праз яе неразумную, безадказную ракетную праграму, якая дэстабілізуе», — заявіў прэс-сакратар камандавання Ціхаакіянскага флоту ЗША Дэвід Бенхэм.
Ён назваў паход «Карла Вінсана» праявай прадбачлівасці і пастаяннай гатоўнасці.
Прэзідэнт ЗША Дональд Трамп раней заявіў, што не дазволіць Паўночнай Карэі ствараць ракеты, якія могуць дасягнуць тэрыторыі ЗША. Ён таксама сказаў, што Вашынгтон пры неабходнасці вырашыць гэтую праблему самастойна.
У склад групоўкі ўваходзяць таксама крэйсер і два эсмінцы, абсталяваныя кіраванымі ракетамі.
Эскадра знаходзілася ў раёне Сінгапура на шляху ў Аўстралію, але атрымала загад змяніць курс.
Авіяносцы класа «Німіц», да якіх адносіцца «Карл Вінсан», маюць даўжыню амаль 330 метраў і водазмяшчэнне за 100 000 тон, яны нясуць на борце ў сярэднім па 80 баявых самалётаў. Па ўдарнай магутнасці яны перавышаюць вайскова-паветраныя сілы многіх краін.
Паўночная Карэя, насуперак рашэнню ААН, працягвае ядзерныя выпрабаванні. Эксперты прагназуюць паўтарэнне гэтых дзеянняў, таму што краіна плануе распрацаваць ядзерную боегалоўку з дыяпазонам, якая дасягне тэрыторыі ЗША.
У сакавіку Паўночная Карэя запусціла ў бок Японскага мора чатыры балістычныя ракеты. Яшчэ адзін пуск прайшоў 5 красавіка напярэдадні візіту ў ЗША кітайскага лідара Сі Цзіньпіна.
КНР — гістарычны саюзнік і галоўны эканамічны партнёр Пхеньяна.
Паведамляецца, што ў Пекіне незадаволеныя празмернай ваяўнічасцю Кім Чэн Ына, але падзення паўночнакарэйскага рэжыму не жадаюць.
Цяпер чытаюць
Азараў закрыў план «Перамога» і перавёў усіх удзельнікаў у рэзерв17
Азараў закрыў план «Перамога» і перавёў усіх удзельнікаў у рэзерв
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3333
Каментары