 |
Косьцю ведае ўвесь горад. Ужо пяць гадоў ён бегае па дарогах самых тлумных вуліц гораду, абганяючы аўтобусы й тралейбусы.
Прычым, хлопец пільнуецца іх маршрутаў, робіць прыпынкі. Як прызнаецца сам Косьця, ён вельмі хоча быць кіроўцам аўтобуса.
Маршрутачнікі й шафёры грамадзкага транспарту Косьцю любяць: даюць грошы на ліманад і булачкі. А аднойчы падаравалі бегуну руль з кляксонам: усьцешаны хлопец ганяў зь ім па праезнай частцы, пакуль забаўку не забралі даішнікі.
Яшчэ маршрутачнікі дзесьці дасталі для Косьці пасьведчаньне тралейбуснага кантралёра, і той з радасьцю прасіў пасажыраў паказаць білецікі.
— Ды ён хлопец бяскрыўдны, — кажа кіроўца маршруткі Валодзя. — Бегае сабе — няхай бегае, усе ўжо прызвычаіліся. Затое якая ў гораду ёсьць унікальная адметнасьць!
У аддзеле прапаганды й прафіляктыкі абласной Дзяржаўтаінспэкцыі не змаглі ўпэўнена сказаць пра ДТЗ, што здараліся б з удзелам пешахода-шафёра. Але паводле слоў кіроўцаў у ДАІ ведаюць пра нестандартныя сытуацыі на дарозе, якія ствараў Косьця:
— Гэта выпадкі экстранага тармажэньня, хлопца ня раз зьбівалі машыны. Вядома, ён парушае правілы, але ўжыць да яго меры адміністрацыйнага ўзьдзеяньня складана. Ягонай праблемай мусяць займацца ня мы, а псыхіятры.
