12 красавіка на 1-м рудаўпраўленні ААТ «Беларуськалій» адбыўся стыхійны сход. Работнікі УСП Трэст «Раммантажбуд» адмовіліся выконваць сваю працу, тым самым выказаўшы сваю незадаволенасць зніжэннем аплаты працы, паведамляе сайт Незалежнага прафсаюза гарнякоў (НПГ) belnp.org.
— Учора атрымалі разліковыя лісткі, сёння падыходзяць людзі з пытаннем: што рабіць, — распавядае старшыня НПГ Трэст «Раммантажбуд» Сяргей Баброў, які браў удзел у стыхійным сходзе. — Заробак упаў удвая, я ў сакавіку 2016 года зарабляў 1400 рублёў, сёння — 710. Людзі сёння пачалі абурацца, кажуць: як жыць далей? Атрымалі па 280 рублёў, а трэба выплачваць крэдыты, за што жыць? Такога ніколі не было!
Рабочыя пайшлі да лінейнага кіраўніцтва, каб яны выклікалі кіраўніцтва трэста. У сваю чаргу дырэктар трэста Курбыка В. М. яшчэ больш абурыў работнікаў, заявіўшы, што няма такога падзення заробку, пра якое кажуць людзі:
— З'явілася адчуванне, што адміністрацыя «плавае» ў маніторынгу заробкаў, альбо папросту хавае звесткі, — кажа Сяргей. — Кіраўнік пачаў пагражаць, заяўляючы, што на наша месца прыйдуць іншыя падрадчыкі і ўсе застануцца без працы і ён, у тым ліку.
На думку работнікаў, замест таго, каб паспрабаваць вырашыць праблему, ён толькі пагоршыў яе. Дзве гадзіны размоў — а ў выніку ні да чаго не прыйшлі. У сваю чаргу дзяржаўны прафсаюз, як заўсёды, змаўчаў.
На думку Сяргея Баброва, было відаць, што работнікі засталіся задаволеныя сабой, не рэагавалі на павышаны тон дырэктара:
— Рэальна адчуваю падтрымку нашых працаўнікоў, нягледзячы на тое, што не арганізоўваў нічога, усё атрымалася спантанна. І гэта выдатна, што людзі самаарганізаваліся, у гэтым я бачу толькі станоўчае. Прычына ў відавочным недаглядзе кіраўніцтва, бо праблема ўзнікла не сёння, а яшчэ пачынаючы са студзеня пачалося падзенне заробкаў. Мы хацелі агучыць гэтыя праблемы на сходзе ўчастка РМУ ў сакавіку, але з кіраўніцтва трэста, акрамя начальніка ўчастка, ніхто не прыйшоў. Убачыўшы такое стаўленне, народ устаў і проста сышоў са сходу.
Са слоў Сяргея, работнікам 1-га РУ званілі работнікі з іншых пляцовак, з 2, 3 і 4-га рудаўпраўленняў, якія заявілі і нам, і свайму кіраўніцтву пра падтрымку нашага патрабавання.
Кіраўніцтва прапанавала сабрацца 13 красавіка, выбраўшы асноўных прадстаўнікоў ад працоўнага калектыву, аб чым яны будуць гаварыць, не вядома, улічваючы тую танальнасць, у якой праходзіла сённяшняя гутарка.
Тым больш адразу ж пасля гэтага выпадку работнікі адчулі найстражэйшы кантроль за распарадкам працоўнага часу. Натуральна, будуць лавіць і сачыць, мяркуе актывіст прафсаюзу. Ужо пайшлі ў адрас НПГ абвінавачванні ў падрыхтоўцы гэтай акцыі, вядома ж, лягчэй шукаць вінаватых у сваіх праліках, лічаць актывісты.
У кіраўніцтве «Беларуськалія» ж заяўляюць, што гэта былі наогул не іх работнікі, бо прадпрыемства «Рэммантажбуд» не ўваходзіць у структуру «Беларуськалія», яно было вылучана ў самастойнае прадпрыемства яшчэ ў 2014 годзе.
