Лідара «Маладога фронта» Змітра Дашкевіча нечакана вызвалілі з СІЗА пад падпіску аб нявыездзе. Дашкевіча абвінавачвалі ў падрыхтоўцы масавых беспарадкаў шляхам стварэння патрыятычнага клуба «Ваяр», які дзяржаўныя СМІ выдавалі за «ўзброенае фарміраванне».
35-гадовы Дашкевіч ужо трэці раз апынуўся ў турме па палітычных матывах. Дома яго чакалі жонка Наста і двое малых дзяцей, Мара і Давыд.
Дашкевіч трымае невялічкі бізнэс па вырабе мэблі, ягоная кампанія называецца «Цесляры». Ён таксама актыўна займаецца грамадскай дзейнасцю.
Літаральна праз гадзіну пасля вызвалення ён даў дома прэс-канферэнцыю, якая транслявалася анлайн у фэйсбуку. На ёй ён назваў абвінавачванні на адрас сябе і сваіх сяброў абсалютна надуманымі, «я зарагатаў, калі прачытаў іх». Ён таксама паабяцаў працягнуць змаганне за грамадзянскія і нацыянальныя правы беларусаў.
Першае сэлфі на свабодзе.
Зміцер Дашкевіч быў затрыманы 21 сакавіка на працоўным месцы. Ён адзін з 35 чалавек, якія праходзяць па так званай «Справе патрыётаў», па якой затрымалі людзей, патэнцыйна здольных узначаліць вулічную дэманстрацыю 25 Сакавіка. Дашкевіч быў сярод тых 17 чалавек, каму было выстаўленае крымінальнае абвінавачванне.
З яго кватэры былі сканфіскаваныя 17 нацыянальных сцягоў, банер з Пагоняй і камуфляжная вопратка. Яго абвінавачвалі ў падрыхтоўцы масавых беспарадкаў з 2011 года, нягледзячы на тое, што ён да 2013 года адседжваў папярэдні тэрмін зняволення.
Зміцер Дашкевіч кажа, што ў зняволенні адмовіўся даваць паказанні.
Гэта была трэцяя пасадка Змітра Дашкевіча па палітычных матывах.
* * *
Пазней стала вядома, што вызвалены таксама паплечнік Дашкевіча Сяргей Пальчэўскі.
Будзе абнаўляцца.
