15 красавіка ў аграгарадку Калодзішчы ў дзверы пенсіянеркі пагрукаў мужчына і прапанаваў купіць у яго мёд. Даверлівая жанчына прынесла кашалёк, і тады незнаёмы выхапіў грошы і ўдарыў гаспадыню. Аб вышуку падазраванага паведамляе УУС Мінаблвыканкама.
Незнаёмы прыйшоў да 77-гадовай пенсіянеркі суботнім днём прыкладна ў 13 гадзін. Калі тая выйшла з кашальком разглядаць тавар, мужчына вырваў партманэ і забраў з яго 200 рублёў.
«Пенсіянерка паспрабавала перашкодзіць крыўдзіцелю, аднак той ударыў яе ў твар і збег», — распавёў афіцыйны прадстаўнік УУС Аляксандр Марчанка.
Распачата справа па арт. 206 Крымінальнага кодэкса (Рабаванне). Зараз міліцыя шукае злачынцу. Маюцца запісы камер назірання, дзе адлюстраваны падазраваны (мужчына ў белай бейсболцы).
Усіх, што што-небудзь ведае пра месцазнаходжанне мужчыны на відэа, просяць паведаміць пра гэта ў міліцыю па тэлефонах: 8 (017) 229-07-01, 8 (017) 267-61-41, 8 (029) 686-76- 90 або 102.
За дапамогу ў вышуку грамадзянам абяцаюць ананімнасць і ўзнагароду.
Фота і відэа УУС Мінаблвыканкама
