Следчы камітэт праводзіць праверку па факце смерці 29-гадовай жанчыны. Яна атруцілася грыбамі, але звярнулася да медыкаў толькі на чацвёрты дзень. Выратаваць яе не ўдалося, распавяла афіцыйны прадстаўнік Следчага камітэта Аксана Салянюк.
Грыб знойдзены на месцы здарэння
Жыхарка аграгарадка Васход у Магілёўскім раёне знайшла ў лесе грыбы смаржкі. Сабраныя грыбы яна адварыла і з'ела. Неўзабаве ёй стала дрэнна, аднак па медыцынскую дапамогу яна не звярталася. Калі на чацвёртыя суткі яе стан значна пагоршыўся, яна выклікала хуткую дапамогу. Жанчына была шпіталізавана ў рэанімацыю, аднак, нягледзячы на аказанае экстраннае лячэнне, выратаваць яе не ўдалося.
«Папярэдне ўстаноўлена, што смерць жанчыны наступіла ад таксічнага дзеяння рэчываў, якія ўтрымліваюцца ў ядомых грыбах», — распавялі ў СК.
Следчымі праведзены агляд мясцовасці, дзе, як мяркуецца, загінулая магла збіраць грыбы. Знойдзеныя грыбы накіраваныя на даследаванні для высвятлення віду і таксічнасці.
У Следчым камітэце таксама нагадалі, што вясновыя грыбы небяспечныя. Смаржкі і страчкі з'яўляюцца ўмоўна-прыдатнымі грыбамі і падлягаюць асаблівай апрацоўцы пры гатаванні, бо ёсць рызыка атручэння з-за ўтрымання ў іх атрутнай гельвелавай кіслаты — моцнага яду.
