Дзяржаўтаінспэкцыя Беларусі паведаміла, што ў ноч зь нядзелі на панядзелак пад Менскам адбыўся рэдкі, як для Беларусі, выпадак — пагоня са стралянінай.
Каля дванаццатай гадзіны ночы супрацоўнікі ДАІ заўважылі жоўты «Фольксваген Гольф», які на вялікай хуткасьці імчаўся ў бок Менску. На патрабаваньні спыніцца кіроўца не адрэагаваў. Пачалася пагоня, але «Гольф» лёгка адарваўся ад міліцэйскіх «Жыгулёў». Тады да справы былі падлучаныя іншыя аўтамабілі ДАІ.
У пэўным месцы трасы патрульная машына стала ўпоперак дарогі ды ўключыла міргалкі. Парушальнік не падпарадкаваўся й на хуткасьці блізу 150 км/г праляцеў міма. Пагоня працягвалася, даішнікі пачалі страляць у паветра. Калі ж і гэта не падзейнічала, міліцыянты пачалі страляць па колах. Уцекача спынілі толькі два прабітыя колы.
Высьвятлілася, што ўсе трое хлапцоў у машыне — п’яныя. Прычым уладальнік аўто зь сябрам спалі на заднім сядзеньні, а ў хлапца за стырном выявілі амаль 3 прамілі алькаголю ў крыві — а гэта 1,5 бутэлькі гарэлкі! Да таго ж, высьветлілася, што два гады таму ў яго забралі правы за кіраваньне машынай у нецьвярозым стане. Зараз кіроўцу аўто пагражае буйны штраф, а ўладальніку ў дадатак — пазбаўленьне правоў на 3 гады.
Кіраўніцтва ДАІ, камэнтуючы выпадак, адзначыла, што свой плён далі майстар‑клясы, якія ўжо паўгады ладзяцца для інспэктараў. Іх пачалі праводзіць пасьля выпадку 2 сакавіка на трасе Слуцк‑Менск, калі п’янога кіроўцу даішнікі спынілі з дапамогай грамадзянскіх машын, у якіх знаходзіліся людзі.
