У пачатку года нецвярозага мужчыну затрымалі ў абласным цэнтры за грубае парушэнне грамадскага парадку. У дачыненні да 45-гадовага жыхара райцэнтра распачалі крымінальную справу за асабліва злоснае хуліганства з нажом. У ходзе расследавання былі праведзены розныя экспертныя даследаванні. Атрыманыя вынікі вывелі на іншае — нераскрытае злачынства.
У 1995 годзе міліцыя распачала крымінальную справу па факце наўмыснага нанясення цяжкіх цялесных пашкоджанняў, якія прывялі да смерці дзяўчыны. Ахвярай невядомага зламысніка стала 17-гадовая жыхарка Калінкавічаў. Але тады злачынцу ўдалося сысці ад правасуддзя. Праз два дзясяткі гадоў міліцыянты выйшлі на след меркаванага забойцы.
У выніку праведзенай генетычнай экспертызы ў дачыненні да хулігана выявілася супадзенне з біялагічным матэрыялам (спермай), знойдзеным на месцы злачынства, здзейсненага ў 1995-м. Па версіі следства, ахвяра злачынства першапачаткова падвергнулася згвалтаванню. Каб схаваць сляды, зламыснік забіў дзяўчыну, нанёсшы ёй некалькі смяротных удараў па галаве.
Падазраваны ў падвойным злачынстве мужчына знаходзіцца пад вартай, у дачыненні да яго прызначаная стацыянарная псіхолага-псіхіятрычная экспертыза. Расследаванне крымінальнай справы працягваецца. Паколькі санкцыя артыкула, якая ставіцца жыхару Калінкавічаў, прадугледжвае пакаранне ў выглядзе смяротнага пакарання, пытанне аб ужыванні тэрмінаў даўніны будзе вырашацца судом.
