Брытанскія газета The Guardian атрымала доступ да метадычных указанняў для мадэратараў Фэйсбука, паводле якіх яны павінны рэагаваць на супрацьпраўны кантэнт. У дапаможніках можна знайсці рэкамендацыі па рэагаванні на публікацыі з суіцыдам, парнаграфіяй, гвалтам, канібалізмам, забойствам і нават знявагай Дональда Трампа.
Супрацоўнікі Facebook апрацоўваюць такую вялікую колькасць дадзеных, што на прыняцце рашэння ў мадэратараў ёсць каля 10 секунд. У супрацоўнікаў інтэрнэт-гіганта ёсць дакладныя рэкамендацыі, як рэагаваць на тую ці іншую сітуацыю, хаця часам прыняць рашэнне ў залежнасці ад рэгіянальнага кантэксту вельмі цяжка. У розных культурах разуменне гвалту і парнаграфіі можа адрознівацца, таму тое, што з’яўляецца для еўрапейца ці амерыканца гвалтам, для жыхара Азіі можа быць усяго толькі рэлігійным абрадам. Праблема ўзнікае і з тым, што лічыць парнаграфіяй, а што — эратычным мастацкім творам.
Вось асноўныя правілы, якімі кіруюцца мадэратары Фэйсбука пры працы са спецыфічным кантэнтам.
- Калі нехта на відэа пагражае забіць Дональда Трампа — такое відэа неабходна выдаляць. Але калі нехта кажа, што «скруціць галаву» Трампу, то такія выразы можна лічыць вобразнымі і не выдаляць відэа.
- Відэа з гвалтоўнай смерцю таксама не заўсёды павінна адразу выдаляцца, бо ў некаторых выпадках можа дапамагчы з расследаваннем абставін.
- Дазваляецца прапускаць відэа з абортамі, калі на іх адсутнічае галізна.
- Не варта выдаляць відэа з пакараннем дзяцей, калі гэтае пакаранне не прапагандуе садызм, а з’яўляецца часткай выхавання.
- Відэа з гвалтам з жывёлаў могуць захоўвацца, але толькі калі аўтар гэтым відэа хоча паказаць сваю заклапочанасць і пазначае, што нельга так абыходзіцца з жывёламі.
- Відэа з галізной рэкамендуецца не выдаляць, калі яно з’яўляецца аб’ектам мастацтва, а не сэксуальнай цягі.
- Жывыя эфіры са спробай самагубства ці самапашкоджання таксама не варта выдаляць, бо дзякуючы такім трансляцыям можна даведацца, дзе чалавек знаходзіцца, і дапамагчы яму.
