У Мінску пад адкрытым небам паказалі беларускамоўны мюзікл «Чыгунка», у якім разам са звычайнымі акцёрамі іграюць дзеці з аўтызмам.
Інтэрактыўны спектакль сабраў на Дзіцячай чыгунцы 35 акцёраў і больш за 300 гледачоў, а асаблівы каларыт пастаноўцы надало прыбыццё сапраўднага цягніка, распавялі ў Сямейным інклюзіў-тэатры «i» і кампаніі velcom, якія выступілі арганізатарамі тэатральнага свята.
Пастаноўка была прымеркавана да Міжнароднага дня абароны дзяцей і паказана бясплатна для ўсіх жадаючых. Перад публікай выступілі 35 акцёраў, у тым ліку дзеці з аўтызмам, і 50 юных чыгуначнікаў. У якасці асноўнай дэкарацыі - перон Дзіцячай чыгункі, які атрымалася гарманічна звязаць з сюжэтам п'есы.
Перад спектаклем выступіў маладзёжны тэатр «Кола», які здолеў уцягнуць гледачоў у тэатральнае дзейства і здзівіць шоў з дрэсіраваным сабакам. Пасля «разагрэву» на станцыю прыбыла «Чыгунка»: юныя акцёры Сямейнага інклюзіў-тэатра ўвасабілі на сцэне сюжэт п'есы, напісанай хлопчыкам з аўтызмам. Пасля спектакля гледачам і юным акцёрам раздалі паветраныя шары і прапанавалі здзейсніць паездку па дзіцячай чыгунцы.
Мюзікл «Чыгунка» не мае аналагаў у свеце. П'еса напісана на беларускай мове па казцы дзіцяці з аўтызмам Кастуся Жыбуля. Яна распавядае пра сяброўства, дабро і права на памылку. У «Чыгунцы» шмат іншасказанняў, адсылак да вядомых твораў, у тым ліку Янкі Маўра, Карнея Чукоўскага, Люіса Кэрала і Уільяма Шэкспіра. У ёй падкрэсліваецца унікальнасць кожнага чалавека, уменне паважаць і прымаць асаблівасці іншых людзей.
«Спектакль пад адкрытым небам стаў для гледачоў цікавым вопытам. Юныя акцёры пастаянна ставяць сабе больш складаныя задачы і гатовыя іграць як на прафесійнай сцэне, так і пад адкрытым небам, - адзначыў начальнік аддзела карпаратыўных камунікацый velcom Вячаслаў Смірноў. - Усяго за паўтара года Сямейны інклюзіў-тэатр «i» стварыў калектыў, які змяняе людзей і дае надзею на тое, што грамадства будзе гатова прыняць «асаблівых» хлопчыкаў і дзяўчынак і дасць ім шанец праявіць свае таленты».
Такога ж меркавання прытрымліваюцца і ў Сямейным інклюзіў-тэатры. «Пастаноўка стала вялікай падзеяй не толькі для дзяцей, якія ў ёй задзейнічаны. Гледачы, якія прынялі ўдзел у тэатральным свяце, былі прыемна здзіўлены тым, што ўбачылі. Хоць, калі шчыра, мы моцна перажывалі, што ўсё можа пайсці не так. Але нашы маленькія акцеры былі сабранымі і праявілі свае здольнасці першакласна, - прызналася мастацкі кіраўнік Ірына Пушкарова. - Такія мерапрыемствы дазваляюць змяніць стаўленне грамадства да дзяцей з аўтызмам».
Спектакль «Чыгунка» - вынік супрацоўніцтва Cямейнага інклюзіў-тэатра і кампаніі velcom, а падрыхтоўкай юных акцёраў бязвыплатна займалася творчая студыя Ірыны Пушкаровай. Прэм'ера спектакля з поспехам прайшла 2 красавіка ў Мінску. Адметнасць пастаноўкі заключаецца ў тым, што на адной сцэне іграюць як звычайныя, так і асаблівыя дзеці. На дадзены момант гэта самы маштабны інклюзіўны спектакль, які калі-небудзь ставілі з удзелам дзяцей з аўтызмам ў СНД і Усходняй Еўропе.
