Фота Ірыны Арахоўскай
Беларусь размясціла два траншы еўрааблігацый з пагашэннем у лютым 2023 года і ў чэрвені 2027 года ў аб'ёме 800 мільёнаў даляраў і 600 мільёнаў адпаведна, паведамляе Рэйтэр са спасылкай на крыніцу ў фінансавых колах.
Даходнасць кароткага траншу была ўстаноўлена на ўзроўні 7,125% гадавых, доўгага выпуску — 7,625%, што прыкладна адпавядае чаканням. Сукупны попыт інвестараў перавысіў 3,1 мільярда даляраў.
Беларуская дэлегацыя 19-21 чэрвеня правяла ў ЗША і Еўропе road show даляравых еўрааблігацый. Арганізатарамі размяшчэння выступаюць Citi, Raiffeisen Bank International AG і Банк развіцця Беларусі.
Раней улады Беларусі заяўлялі, што ў 2017 годзе маюць намер выпусціць еўрааблігацыі на суму да 1 млрд даляраў.
Беларусь вяртаецца на міжнародны пазыковы рынак пасля працяглай паўзы. У студзені 2011 года 7-гадовыя суверэнныя еўрааблігацыі размяшчаліся на 800 млн даляраў пад 8,95%. Гэта адзіны выпуск еўрабондаў Беларусі, які знаходзіцца ў звароце. У ліпені 2015 года Мінфін пагасіў 1 млрд даляраў па дэбютным еўрабондах, размешчаных у 2010 годзе. Выплата адбылася ў асноўным за кошт паступленняў мытных пошлін і запазычанні на расійскім рынку.
