Міхалок рэзка выказаўся пра блогера Матольку, але аказалася, што зблытаў яго з Ганнай Бонд
У суботу падчас канцэрта на хутары Шаблі ў Валожынскім раёне музыка Сяргей Міхалок з гурту Brutto ( раней «Ляпіс») адказаў блогеру Антону Матольку.
Гаворка была пра нібыта крытычныя заўвагі ў сацсетках аб удзеле Міхалка ў рэкламе авіякампаніі «Белавія», дзе спявак чытае верш Багдановіча «Слуцкія ткачыхі».
Міхалок падшпіліў: «У мяне ёсць сястрычка Волька, а ўчора я даведаўся, што ёсць нейкі Матолька».
Міхалок рэзка адхіліў абвінавачванні ў «калабарацыі». Ён у метафарычнай форме і характэрным сумбурным стылі заявіў пра неабходнасць жыць жыццём сваёй краіны, быць пазітыўным, заявіў, што хоча, каб беларуская мова і беларушчына асацыяваліся з сілай, а не слабасцю. Міхалок таксама асудзіў людзей, якія займаюцца крытыканствам з нагодай і без нагоды. Вечны хайп адцягвае ад праўдзівага жыцця, такую думку правёў Міхалок.
Публіка прыняла гэты пасаж Міхалка апладысментамі.
Як напісаў у фэйсбуку сам Антон Матолька, словамі Міхалка ён быў здзіўлены і збянтэжаны, бо не толькі нідзе не крытыкаваў рэкламны ролік, але нават не бачыў яго.
Сёння раніцай прадзюсар «Брута» Антон Азізбекян напісаў у фэйсбуку, быццам Міхалок пераблытаў Матольку з Ганнай Бонд. Такім чынам, кола ўцягнутых у гэтую дзіўную гісторыю людзей працягвае пашырацца.
Каментары