Генпракуратура прыцягнула да дысцыплінарнай адказнасці міністра культуры Барыса Святлова
Генеральная пракуратура праверыла, наколькі выконвалася заканадаўства пры выкарыстанні аб'ектаў гісторыка-культурнай спадчыны. Гаворка вядзецца пра вядзенне прадпрымальніцкай дзейнасці на культурных аб'ектах, адзначаецца ў паведамленні ведамства.
Паводле прэзідэнцкага ўказа №527 ад 18 кастрычніка 2007 года, арганізацыі мусяць рабіць адлічэнні за прадпрымальніцкую дзейнасць, якая аказвае непасрэднае ўздзеянне на гісторыка-культурную каштоўнасць, а таксама пры патрэбе сплачваць кампенсацыю за нанесеную шкоду.
Аднак, як адзначана ў ходзе праверкі, гэтыя патрабаванні ў поўнай меры не выконваліся, бо Міністэрства культуры і мясцовыя выканкамы недастаткова кантралявалі сітуацыю.
Нярэдка на фасадах гістарычных будынкаў былі змантаваныя трубы, выцяжкі, прамысловыя кандыцыянеры, а на дахах — антэна-фідэрныя прылады электрасувязі кампаній, аператараў сотавай сувязі. Але кампенсацыйныя адлічэнні ў бюджэт за нанесеную шкоду былі адзінкавымі.
Для ліквідацыі выяўленых парушэнняў Генеральнай пракуратурай у Савет міністраў Рэспублікі Беларусь накіравана адпаведная інфармацыя, у Міністэрства культуры ўнесена прадстаўленне.
Па выніках разгляду актаў пракурорскага нагляду да дысцыплінарнай адказнасці прыцягнуты міністр культуры Барыс Святлоў.
Цяпер чытаюць
Дзядок патлумачыў, чаму вызвалілі менавіта тых палітвязняў, каго вызвалілі24
Каментары