Ніхто не любіць прапускаць добрыя святы. Але дзякуючы уладам, мы раней прагапілі мноства выдатных дат, якія можна было б годна адзначыць на нацыянальна, а то і сусветным узроўні:
2010 — 600-годдзе Грунвальдскай бітвы
2013 — 150-годдзе паўстання Каліноўскага
2014 — 500-годдзе бітвы пад Оршай
Затое на «Славянскія базары» (хутчэй, ганьбы) грошы ёсць. Ці вось улады Магілёва на Дзень горада запрасілі Газманава (праспяваў 5 песень), Лешчанку (4 песні) і Аляксея Вараб'ёва (праспяваў 2 песні). На гэтых траіх блазнаў сышло 84 тысячы даляраў бюджэтных грошай.
У гэтым годзе будуць дзве даты з круглым юбілеем, якія супрацьстаяць адна адной па сутнасці і духу:
6 жніўня 2017 — 500-годдзе беларускай Бібліі.
7 лістапада 2017 — 100-годдзе бальшавіцкага перавароту (Беларусь адзіная, хто да гэтага часу адзначае 7 лістапада на дзяржаўным узроўні).
Я зайшоў на афішу TUT.BY і Relax.by, праверыў дату 6 жніўня і зразумеў, што ніхто з прыватнага сектара да гэтай вялікай даты нічога не рыхтуе. Затое ўпэўнены, што да сёмага лістапада нават самыя апошнія клубы-гадзюшнікі будуць наліваць лішні кілішак за вершы пра Леніна ці савецкі дрэс-код (як гэта і бывае кожны год).
Нам трэба вучыцца самім ствараць запыты або арганізоўваць нацыянальныя святы, калі нават дзяржава іх ігнаруе і спускае народныя грошы на замежную папсу. Бо засталося ўсяго 2 тыдні да вялікай даты, калі Скарына вывеў ВКЛ у топ прагрэсіўных краін свету.
І застаецца таксама ўсё менш часу да 100-годдзя БНР у наступным годзе. Смуткаваць, гараваць, ныць і пакутаваць мы ўсе ўмеем. Але часам куды важней умець зрабіць самім сабе цудоўнае свята.