Імаверна, кампанія вырашыла яшчэ больш укараніць галасавое кіраванне ў нашае жыццё. Тварам новага раздзелу стаў амерыканскі рэслер і кінаакцёр Дуэйн Джонсан, вядомы пад псеўданімам Скала (The Rock). У адмысловым рэкламным відэароліку паказваецца дзень з жыцця акцёра, на працягу якога ён раз за разам звяртаецца да Siri з рознымі пытаннямі і загадамі.
У новым раздзеле можна прагледзець варыянты магчымых камандаў, якія разумее Siri. Каманды падзеленыя па катэгорыях: асновы, камунікацыя, арганайзер, спорт, разумны дом, навіны і іншае.
Для выканання шмат якіх задач вам не спатрэбіцца ўключаць тэлефон — можна толькі сказаць «Прывітанне, Siri» і спытаць, напрыклад, наступнае:
- «Напішы Змітру, што я спазнюся на 20 хвілін»
- «Пастаў будзільнікі на 7:50 і 8:00»
- «Нагадай заўтра раніцай забраць пошту»
- «Якое сёння чакаць надвор'е?»
- «Колькі шклянак у адным літры?»
- «Дзе тут побач можна нядорага падсілкавацца?»
- «Што значыць «прагматычны»?»
- «Колькі будзе 18% ад 85 рублёў?»
- «Напішы ў Твітары, што сёння быў найлепшы дзень у маім жыцці»
Шмат якія з каманд вы ўжо, напэўна, ведалі і выкарыстоўвалі. Але ўпершыню «Эпл» стварыла такі «падручнік» па галасавым кіраванні, дзе прыведзеная вялікая колькасць каманд, якія сапраўды могуць спрасціць паўсядзённае ўзаемадзеянне з тэлефонам.
Siri разумее не ўсе мовы. Пакуль што наўрад ці яна зразумее вас, калі вы звернецеся па-беларуску, але на дапамогу заўсёды прыйдуць англійская і руская мовы.
Siri — персанальны памочнік, які ўваходзіць у склад iOS, watchOS, macOS, і tvOS кампаніі Apple. Гэты дадатак выкарыстоўвае апрацоўку натуральнай гаворкі чалавека, каб выконваць загады, адказваць на пытанні і даваць рэкамендацыі. Siri прыстасоўваецца да кожнага карыстальніка індывідуальна, вывучаючы яго голас і перавагі на працягу доўгага часу.
