У судзе Маскоўскага раёна Мінска працягваецца суд над 28-гадовым Андрэям Гаўрошам. Мужчыну, у якога ў навагоднюю ноч тры разы стрэліў міліцыянт, вінавацяць у супраціве міліцыі, яму пагражае да 5 гадоў турмы.
Андрэй Гаўрош.
На першым пасяджэнні паказанні даў пацярпелы — 24-гадовы міліцыянт Руслан Салаўёў. Паводле яго версіі, у адказ на заўвагу Гаўрош пачаў бойку. Руслан заўважыў, што кабура расшпілілася, вырашыў, што ў яго хочуць адабраць пісталет і стрэліў у мужчыну.
Руслан Салаўёў.
28 ліпеня сваю версію распавёў абвінавачаны Андрэй Гаўрош.
Па яго словах, кампаніяй у яго кватэры, адзначалі Новы год, пілі гарэлку. Калі прыйшоў сусед і паскардзіўся на шум, Гаўрош кажа, што не канфліктаваў, вярнуўся ў кватэру і зрабіў музыку цішэй.
«Праз некаторы час пазванілі ў дамафон. Я адкрыў і выйшаў у «тамбур». Там быў супрацоўнік міліцыі. Ён прадставіўся, сказаў, што на мяне паступіла скарга ад суседзяў — шумна, - узгадаў Гаўрош. — Я сказаў, што ў нас шуму аніякага няма. Хто скардзіўся міліцыянт адмовіўся сказаць.
Затым я зрабіў крок да яго, левай рукой паказаў наверх — на суседзяў зверху — і палез па тэлефон.
У гэты момант міліцыянт ударыў мяне рукой па тулаву. Я пачаў падаць у тамбур, спрабаваў утрымацца на нагах і схапіўся за супрацоўніка міліцыі.
Затым, спыняючы агрэсію, я яго выштурхнуў з «тамбура». Мы аказаліся за парогам — ён каля ліфта, я на паўкрока за парогам».
Па словах абвінавачанага, міліцыянт не прапаноўваў яму праехаць у аддзяленне. А сам ён забраць пісталет не намагаўся, «увогуле яго не бачыў», запэўніў Гаўрош.
«Я зноў палез у кішэню па тэлефон. У гэты момант я пачуў хлапок. Што гэта было я не зразумеў. Далей цяжка сказаць: падкасіліся ногі, я пачаў падаць. Ляжаў ля ліфта. Міліцыянт быў на лесвіцы з выцягнутай рукой у кірунку маіх дзвярэй. Пасля я пачуў жаночы голас, які казаў, што трэба выклікаць хуткую… Далей не памятаю», - распавёў Андрэй Гаўрош.
Мужчына кажа, што выпіў менш за бутэльку гарэлкі. У крыві яго знайшлі 1,88 праміле алкаголю, але мужчына сцвярджае, што быў адэкватны.
Музыка грала не надта гучна, запэўніў Гаўрош. Ці спявалі песні, як казалі суседзі, — ён не памятае.
Цікава, што калі Андрэй Гаўрош пасля рэанімацыі ляжаў у шпіталі, прайшоў суд па адміністратыўнай справе за той шум на Новы год. Мужчыну прызналі вінаватым у парушэнні парадку. Далі штраф.
«350 рублёў, здаецца», — сказаў Гаўрош.
Пракурор спытала ў абвінавачанага, як ён ставіцца да пазова пацярпелага міліцыянта (той папрасіў спагнаць з Гаўроша 87 рублёў за пашкоджаную форму).
«Я гэтага не рабіў, - адказаў Андрэй Гаўрош. - Але аплаціць гатовы».
Нагадаем, канфлікт адбыўся 1 студзеня каля 7 раніцы. Сваякі Гаўроша не бачылі бойку, яны выскачылі з кватэры ўжо пасля стрэлаў. Па версіі міліцыі, праваахоўнік, якога выклікалі суседзі, папрасіў Андрэя зрабіць музыку ў кватэры цішэйшай, пасля чаго той кінуўся на яго. Міліцыянт стрэліў, каб спыніць п’янага мужчыну.
Пасля Андрэй трапіў у бальніцу. Па словах міліцыі, лячыўся і той супрацоўнік МУС, які страляў — у яго нібыта дыягнаставалі чэрапна-мазгавую траўму.
Гаўроша пасля рэанімацыі адразу перавялі ў СІЗА. Далейшы яго лёс вырашыць суд.
Пасля здарэння МУС праводзіла праверку паводзінаў супрацоўніка, але парушэнняў не знайшлі. Гэта падкрэсліваў і міністр МУС Ігар Шуневіч, адзначыўшы, што маладому міліцыянту хіба «трохі не хапіла прафесіяналізму».
Дайшла гэтая гісторыя нават да Лукашэнкі. Ён таксама падтрымаў міліцыянта.