Фота са старонкі Артура Міхайлава «Укантакце».
Саліст ансамбля, маладзечанец Артур Міхайлаў, ноччу вяртаўся на аўтобусе з Масквы ў Мінск. І раптам адчуў моцны ўдар нажом у сківіцу…
Пра тое, што здарылася ў аўтобусе, Артур расказаў «Рэгіянальнай газеце»:
— Шчыра кажучы, я хачу забыцца пра тую гісторыю. Нічога гераічнага ў ёй няма. Вяртаўся я са свайго сольнага канцэрту, таму ехаў адзін, як Артур Міхайлідзі. У аўтобусе Масква — Мінск ехаў адзін неўраўнаважаны пасажыр. Ён з самай Масквы шукаў канфлікту. То яму дзьме, то яму моцна размаўляюць у салоне, то яму няма месца, то сусед не той. Яму неаднаразова рабілі заўвагі, здавалася, што ён нарэшце супакоіўся.
Калі сцямнела, Артур дастаў навушнікі і ўключыў фільм. І раптам адчуў моцны ўдар нажом у сківіцу.
— Той мужчына з нажом хадзіў па салоне, чаму ён выбраў менавіта мяне, я не ведаю. Але ўдарыць ён меціўся ў шыю. Я ўскочыў, спрабаваў вырваць нож у яго з рук, аднак гэта было не так проста. Мужчына аказаўся вельмі дужым.
Уціхамірыць хулігана Артур змог толькі з дапамогай двух хлопцаў, што прыйшлі на дапамогу.
Артуру Міхайлаву медыкі наклалі на твар восем швоў.
— Я некалькі дзён наогул не мог гаварыць. Канешне, у канцэртнай дзейнасці я вымушаны зрабіць перапынак. Дырэктар «Песняроў» Раман Козыраў даў бальнічны. Ці баюся я, што застанецца шнар? Так, я ж артыст. Але я ведаю, што шнары ўпрыгожваюць мужчыну, — сумна смяецца Артур і дадае: — Лепш бы спыталіся мяне пра сольную кар’еру, а то ўсіх цікавіць толькі панажоўшчына.
Па словах Артура, мужчыну, што напаў на яго, пагражае да пяці гадоў пазбаўлення волі. Нападнік — расіянін, жыхар Падмаскоўя, былы вайсковец.
