Сённяшняя пятніца стала цудоўным днём для супрацоўнікаў Камароўкі, фанатаў яе інстаграма і асабіста Івана Ткачука, начальніка аддзела сацыяльнага развіцця рынку, які займаецца яго напаўненнем: акаўнт зноў з’явіўся ў стужцы карыстальнікаў. Карацей, бабу Раю не зламаць.
Нагадаем, на днях хакеры (хутчэй за ўсё з Расіі) узламалі інстаграм Камароўкі і пачалі патрабаваць 15 тысяч расійскіх рублёў за яго аднаўленне. Аднак даваць грошы ўзломшчыкам ніхто не збіраўся. Ткачук звярнуўся ў міліцыю, а пра крадзеж інстаграма напісалі дзясяткі як беларускіх, так і рускіх СМІ.
Хакер, вярнуўшы сёння інстаграм, на пытанне, што падштурхнула яго на такі жэст, аджартаваўся: «Цуды здараюцца». Іван Ткачук кажа, што «цуду» дапамагла адбыцца грамадзянская салідарнасць:
«Пра злачынства напісалі столькі людзей, так шмат гучала словаў падтрымкі і прапаноў дапамогі… Мы вярнулі наш інстаграм беларускай грамадой, талакой. Гэта даказвае, што наш народ можа аб'ядноўвацца ў імя добрых спраў. У мяне нават камяк у горле стаіць ад наплыву эмоцый, я ўдзячны ўсім, хто нас падтрымліваў», — падзяліўся з «НН» сваімі пачуццямі Іван.
Пакуль інстаграм Камароўкі не працаваў, ад яго адпісаліся каля 1,5 тысячы чалавек. Стваральнікі не адчайваюцца: гэта справа нажыўная. Галоўнае, што кантэнт не згублены.
Цяпер чытаюць
«Я гатовая стаць міністрам эканомікі Беларусі». Новы твар у Кабінеце Аліса Рыжычэнка — пра карупцыю на карысць Лукашэнак, Зарэцкую і рэформы47
Каментары