Пры падключэнні тэлефона iPhone да некаторых аўтамабільных стэрэасістэм ёсць адна невялікая праблема — аўтаматычна пачынае граць першая песня з плэйліста па алфавіце. Кожны раз адна і тая ж песня, пакуль карыстальнік не абярэ спіс для прайгравання.
Нейкі карыстальнік па імені Самір Мезрахі стаў сапраўдным героем для мільёнаў уладальнікаў iPhone, якія стаміліся слухаць адно і тое ж. Ён выклаў у iTunes дзесяціхвілінную песню без гуку A a a a a Very Good Song - Single.
Запампаваўшы гэтую песню і дадаўшы ў свой плэйліст, вы атрымліваеце 10 хвілін поўнай цішыні пры падключэнні тэлефона да стэрэасістэмы. Ёсць час, каб спакойна выбраць альбомы для праслухоўвання.
Твіт Саміра з анонсам песні атрымаў 5015 рэтвітаў і 15 278 адзнак «Падабаецца», а сама песня без гуку ўжо забралася на 30-е месца хіт-парада самых папулярных песень iTunes.