Помнік народнаму артысту СССР, заснавальніку ансамбля «Песняры» Уладзіміру Мулявіну адкрылі ў Мінску 17 жніўня, пішуць «Мінск-Навіны».
Помнік паставілі на бульвары Мулявіна ў скверы за Белдзяржфілармоніяй.
Па задумцы скульптара Аляксандра Каструкова, музыка адлюстраваны ў сцэнічным касцюме з гітарай у руках. Знакаміты пясняр прысеў на прыступкі і задуменна глядзіць удалячынь. Вобраз абраны роднымі артыста.
Гэтая скульптура — свайго роду зваротны падарунак расійскага боку, які фінансаваў стварэнне і дастаўку помніка. Пастаўлены ён за кошт бюджэту Мінска. У кастрычніку 2014 года па ініцыятыве Міністэрства культуры Рэспублікі Беларусь помнік Уладзіміру Мулявіну паставілі ў Екацярынбургу — горадзе, дзе ён нарадзіўся і дзе прайшло яго дзяцінства.