Чэшскі даследчык Якуб Марыян склаў карту, на якой паказана, як у еўрапейскіх краінах называюць восьмы месяц у годзе. Аказалася, што беларусы — адзіная нацыя на кантыненце, якая выкарыстоўвае назву «жнівень».
Фота: jakubmarian.com
Самая распаўсюджаная назва месяца — гэта «аўгуст». У Старажытным Рыме тытул «Augustus» (літаральна — «Велічны») атрымаў Актавіян Аўгуст (пры нараджэнні — Гай Актавій Фурын), прыёмны сын Гая Юлія Цэзара. Менавіта ў гонар яго быў названы восьмы месяц у годзе.
Другое месца па распаўсюджанасці займаюць вытворныя ад слова «серп», звязанага з уборкай ураджаю (ужываецца ў Польшчы, Украіне і Чэхіі).
На трэцім месцы ірландская Lunasa і гэльская Lùnasdal. Яны атрымалі сваю назву ў гонар бога Лугі з ірландскай міфалогіі.
Акрамя «жніўня» (назва ўтварылася ад слова «жніво») на карце можна ўбачыць літоўскі rugpjūtis («месяц, калі зразаюць жыта»), фінскі elokuu («месяц ураджаю») і харвацкі kolovoz. Ён з'явіўся ад зліцця двух слоў: kolo («кола») і voziti («вадзіць транспартны сродак»).
Таксама на карце адлюстраваны некалькі іншых назваў. Яны ўжываюцца ў мовах паўночных народаў, якія не маюць сваёй дзяржаўнасці.