У ноч з 15 на 16 жніўня работнік службы таксі падабраў на Рэчыцкім праспекце ў Гомелі двух мужчын і павёз у кірунку папулярнага рэстарана. Кіроўца яшчэ не ведаў, што грошай на забаўляльную ўстанову пасажыры не маюць, паведамілі ва УУС Гомельаблвыканкама.
На скрыжаванні вуліц Карбышава і Зорнай кліенты прымусілі кіроўцу выйсці з машыны, збілі да страты прытомнасці. Пасля, прыхапіўшы грошы (каля 100 рублёў), тэлефон і планшэт, уцяклі. Апрытомнеўшы, пацярпелы таксіст патэлефанаваў у міліцыю.
Праваахоўнікі вылічылі злачынцаў на працягу некалькіх гадзін. Імі аказаліся прыяцелі 1991 і 1994 гадоў нараджэння — раней неаднаразова судзімыя гамяльчук і яго знаёмы з Хойнікаў.
Частку выкрадзеных грошай зламыснікі паспелі выдаткаваць. У дачыненні да рабаўнікоў заведзеная крымінальная справа.
