Фэст беларускай бардаўскай песьні «Аршанская бітва — 2008» прайшоў каля вёскі Гацькаўшчына пад Воршай.
Першыя ўдзельнікі пачалі зьбірацца на Крапівенскім полі яшчэ ўдзень 6 верасьня, нягледзячы на тое, што пачатак фэсту быў прызначаны на 20.00. Пакуль госьці ставілі намёты, аршанскія актывісты майстравалі сцэну для выступоўцаў.
Над намётавым летнікам ўзьвіліся бел-чырвон-белыя сьцягі. Аднак супрацоўнікі Аршанскага РУУС, спаслаўшыся на загад кіраўніцтва, загадалі зьняць сьцягі, у супрацьлеглым выпадку пагражаючы масавымі затрыманьнямі. Пэўны час аматары сьпеваў спрачаліся з ахоўнікамі правапарадку, якія выклікалі падмацаваньне: на полі зьявіўся начальнік Аршанскага райаддзелу міліцыі Леанід Міхайлаў і штатны відэааператар з камэрай, які зьняў усіх прысутных на полі. Спадар Міхайлаў загадаў канфіскаваць наяўныя сьцягі, паабяцаўшы вырнуць іх гаспадарам па сканчэньні фэсту.
Адзін сьцяг міліцыянты забралі, але самы вялікі — той, што ўпрыгожваў сцэну, зьняць не наважыліся. Пад гэтым бел-чырвон-белым сымбалем канцэрт бардаўскай песьні распачаў Зьміцер Сідаровіч.
Сідаровіч быў адным з удзельнікаў самага першага фэсту «Аршанская бітва», які адбыўся ў 1991 годзе. Сёлета слухачы атрымалі ў падарунак адмысловую брашуру, прысьвечаную гісторыі аршанскай бардаўскай імпрэзе.
Брашуру, укладальнікам якой стаў Юрый Копцік, атрымалі ўсе ахвотныя.
Летась фэст ледзьве ня быў сарваны: напярэдадні міліцыя распаўсюдзіла інфармацыю, што на месцы, дзе зазвычай праходзіць фэст, знайшлі міны і снарады. Фэст вырашылі перанесьці ў іншае месца, але міліцыянты, у аўральным парадку зьвезеныя на Аршаншчыну з трох бліжэйшых раёнаў, загадвалі людзям з пляцакамі і гітарамі разварочвацца і кіравацца дадому. Некалькі дзесяткаў актывістаў былі затрыманыя.
Выказваліся меркаваньні, што фэст «Аршанская бітва» ужо не адновіцца пасьля міліцэйскага разгону – што людзі проста больш на яго не зьбяруцца. Аднак людзі прыехалі, хаця сёлетні фэст атрымаўся й ня самым масавым за ўсю ягоную гісторыю: паслухаць выступоўцаў і пасьпяваць сабралася каля 150 чалавек.
