Дубавец Сяргей. Вершы. Менск: Мэдысонт. 2007 – 86 с. 500 ас.
Як вы здагадаліся, гэта ня зборнік вершаў. Калі пагартаеш кнігу, высьвятляецца, што яна, да таго ж, ня толькі “прыватнае дасьледваньне сучаснай паэзіі”, як тое цьвердзіць анатацыя. У васьмі артыкулах пра паэзію і паэтаў першы рэдактар адноўленай "НН" Сяргей Дубавец хутчэй спрабуе намацаць выйсьце зь нявыкруткі, у якой апынуўся нацыянальны рух у краіне, якую колісь вымысьліў паэт.
Самае важнае пра Беларусь пакуль што па-ранейшаму прамаўляецца вуснамі паэтаў і будучая Беларусь бачыцца выключна іхнімі вачыма. І, пэўна, таму для заснавальніка “Свабоды” – гучнага палітычнага выданьня пачатку 90-х - менавіта паэзія сталася цэнтрам увагі. Гэтай кнігай спадар Сяргей патрымлівае сваё рэнамэ ідэоляга беларушчыны.
Знакавы артыкул – “Крыўда паэтаў”. Зь іншых артыкулаў хочацца адзначыць “Паэзія або сьмерць” – безагляднае даваньне нырца ў глыбіні творчасьці Анатоля Сыса і Леаніда Галубовіча.
